У Мінску 7 верасня пачала сваю працу пятая пазачарговая сесія Палаты прадстаўнікоў Нацыянальнага сходу Беларусі. Як заявіў старшыня Палаты прадстаўнікоў Уладзімір Андрэйчанка, яна была склікана для аператыўнага прыняцця пакету дакументаў бюджэтна-фінансавай і падатковай сферы. Прызначэнне даты прэзідэнцкіх выбараў парламент не ўключыў у парадак дня.
Па словах спікера беларускага парламенту, законапраекты, якія плануюць разгледзець дэпутаты, маюць вызначальнае значэнне для забеспячэння ўстойлівага развіцця Беларусі. «Яны закліканы стварыць належныя ўмовы для росту дабрабыту беларускіх грамадзянаў, а таксама ў значнай ступені зменяць ўмовы вядзення бізнэсу ў краіне», — падкрэсліў спікер.
Уладзімір Андрэйчанка нагадаў, што, паводле даручэння прэзідэнта Беларусі, падобныя дакументы павінны ўводзіцца ў дзеянне не раней чым праз тры месяцы з дня падпісання. Гэты час адводзіцца на тое, каб суб’екты гаспадарання і грамадзяне маглі падрыхтавацца да працы ў новых умовах, а дзяржаўныя органы — прывесці ў адпаведнасць з прынятымі нормамі падзаконныя акты.
«Інавацыйны характар законапраектаў, занесеных у парадак дня, — гэта вынік дзейнасці па ўдасканаленні заканадаўства, накіраванай на нейтралізацыю негатыўных наступстваў глабальнага фінансава-эканамічнага крызісу, мадэрнізацыю нацыянальнай эканомікі, стымуляванне інвестыцыйнай і дзелавой актыўнасці ў краіне», — заявіў Уладзімір Андрэйчанка.
Так, па словах спікера, папраўкі ў Падатковы кодэкс накіраваны не толькі на далейшае спрашчэнне падатковай сістэмы, але і на змяншэнне падатковай нагрузкі на прадпрыемствы. Напрыклад, плануецца істотна скараціць колькасць плацяжоў, спрасціць працэдуры іх спагнання. Акрамя таго, па словах Уладзіміра Андрэйчанка, змест кодэксу стане больш даступным для ўспрымання і зразумелым не толькі спецыялістам, але і шараговым грамадзянам.
Акрамя таго, як распавёў кіраўнік Палаты прадстаўнікоў, на пазачарговай сесіі парламенту абмяркуюць праект рэспубліканскага бюджэту на 2011 год. Па словах Уладзіміра Андрэйчанкі, у ім закладзеныя дзве стратэгічныя задачы: забяспечыць падтрымку рэальнага сектару эканомікі (у прыватнасці, у інавацыйнай сферы) і захаваць сацыяльную накіраванасць бюджэту і дасягнуты ўзровень дзяржаўных сацыяльных стандартаў.
У цэлым, праекты законаў, якія разгледзяць дэпутаты, закліканы надаць новы імпульс для інтэнсіўнага развіцця канкурэнтаздольнай эканомікі і павышэння ўзроўню і якасці жыцця людзей, падкрэсліў Уладзімір Андрэйчанка.