Пасол Кыргызскай Рэспублікі ў Рэспубліцы Беларусь, пастаянны прадстаўнік краіны ў статутных органах Садружнасці незалежных дзяржаў Ішэнкуль Балджурава 4 верасня падала ў адстаўку. У дадзены момант дыпламат знаходзіцца ў Кыргызстане. Заяву аб адстаўцы яна асабіста перадала прэзідэнту Кыргызстана пераходнага перыяду Розе Атунбаевай.
Ішэнкуль Балджурава мае намер пакінуць займаныя ёю пасты па ўласным жаданні. Рашэнне, якое прыме прэзідэнт Роза Атунбаева, пакуль невядома, паведамляе 24.kg.
Як раней паведамляў Тэлеграф, пасол Кыргызстана ў Беларусі Ішэнкуль Балджурава 23 красавіка на прэс-канферэнцыі ў Мінску заявіла журналістам, што кіргізскае дыпламатычнае прадстаўніцтва ў Мінску не падпарадкоўваецца прэзідэнту Курманбеку Бакіеву. «Бакіеў уласнаручна падпісаў адмову ад пасады прэзідэнта і таму страціў ўладу», — падкрэсліла дыпламат.
У той жа час, Ішэнкуль Балджурава заявіла, што Беларусь не абавязаная экстрадаваць Курманбека Бакіева на радзіму. «Мне здаецца, што экстрадыцыя — гэта не столькі абавязак, колькі права», — адзначыла дыпламатка, спасылаючыся на «прыклады наогул экстрадыцыі ў міжнароднай практыцы».
