Сёння, 14 ліпеня, першыя 1,5 тыс. прызыўнікоў лета 2010 адправіліся на тэрміновую службу ва Узброеныя Сілы Беларусі. Пра гэта распавёў намеснік начальніка ўпраўлення, начальнік аддзелу прызыву на ваенную службу галоўнага арганізацыйна-мабілізацыйнага ўпраўлення Генштаба ўзброеных сілаў Андрэй Мурашоў. Пры гэтым намеснік начальніка адзначыў, што адпраўка ў войскі працягнецца да 30 ліпеня.
Да гэтага часу на тэрміновую службу і службу ў рэзерве накіруюць больш за 120 тыс. чалавек. Прызыўныя камісіі ўжо вынеслі больш за 40 тыс. рашэнняў. У 22 тыс. выпадкаў прызыўнікам далі адтэрміноўкі, 80% якіх звязаныя з працягам адукацыі. Таксама права на адтэрміноўку атрымалі дзеці-сіроты, дзеці, якія засталіся без апекі бацькоў, грамадзяне з пэўнымі захворваннямі і тыя, што знаходзяцца ў цяжкім сямейным становішчы.
«Сярод прызыўнікоў ухіліцца ад службы ў войску спрабуе толькі 1% маладых людзей», — расказаў Андрэй Мурашоў, паведамляе БелТА.
Летні прызыў працягнецца да верасня. Цырымонію прыняцця ваеннай прысягі ў злучэннях і воінскіх частках УС правядуць 14 жніўня.
