Міжнародная камісія Сойму Польшчы 25 лістапада ўхваліла кандыдатуру 46-гадовага Лешэка Шарэпкі ў якасці новага амбасадара Польшчы ў Беларусі. Кандыдатуру пасла павінен яшчэ зацвердзіць польскі прэзідэнт Браніслаў Камароўскі. Чакаецца, што кіраўнік дыпламатычнай місіі зможа прыбыць у Мінск ужо ў пачатку новага года.
Лешэк Шарэпка да гэтага выконваў абавязкі намесніка пасла ва Украіне і быў першым сакратаром польскай амбасады ў Расіі, паведамляе БелаПАН са спасылкай на польскі рэсурс Kurier Poranny.
Раней польскія СМІ у якасці найбольш верагоднага кандыдата на пасаду амбасадара ў Беларусі называлі дырэктара дэпартаменту супрацоўніцтва пры міністэрстве замежных справаў Польшчы Марэка Зюлкоўскага, у якога таксама ёсць досвед працы паслом ва Украіне.
Папярэдні амбасадар Польшчы ў Беларусі Генрык Літвін пакінуў Мінск у красавіку 2010 года неўзабаве пасля авіякатастрофы польскага ўрадавага самалёта пад Смаленскам. У цяперашні час дыпламатычным прадстаўніцтвам Польшчы ў Беларусі кіруе часовы павераны Вітальд Юраш.
