На працягу 2010 года стаўка рэфінансавання ў Беларусі памяншалася пяць разоў. Пры гэтым створаны неабходныя ўмовы для далейшага зніжэння гэтага паказчыка. Такое меркаванне выказаў сёння, 17 жніўня, на сустрэчы з прэзідэнтам Беларусі Аляксандрам Лукашэнкам старшыня праўлення Нацыянальнага банка Пётр Пракаповіч.
З 18 жніўня стаўка рэфінансавання будзе паменшаная пяты раз за год і складзе 11% гадавых супраць 13,5% у студзені 2010 года. Па словах Пятра Пракаповіча, гэтая праца будзе працягвацца і ў далейшым, бо для гэтага ёсць усе ўмовы, перадае БелТА.
Дзякуючы стварэнню спрыяльных умоваў запазычанняў ў рэспубліцы павялічыліся і аб’ёмы крэдытавання. Так, па дадзеных на 1 жніўня 2010 года, аб’ём выдадзеных банкамі пазык эканоміцы павялічыўся больш чым на 34% у параўнанні з аналагічнай датай мінулага года.
Кіраўнік дзяржавы, у сваю чаргу, запатрабаваў ад Нацбанка, каб у далейшым выконваліся ўсе паказчыкі грашова-крэдытнай палітыкі, асабліва, датычныя крэдытавання і рэалізацыі працэнтнай палітыкі.
