Беларуская транспартная пракуратура раскрытыкавала якасць вучэнняў, якія праводзіліся ў мінскім метро. За 2010 год тут было арганізавана 115 вучэнняў, 42 з іх — па выяўленні выбуховых прыладаў. "Аднак, і гэта паказалі апошнія падзеі, напрошваецца выснова, што ўсе гэтыя вучэнні праводзіліся фармальна, так бы мовіць, для галачкі", — заявілі ў пракуратуры.
Такую заяву прадстаўнікі ведамства зрабілі 28 красавіка ў ходзе каардынацыйнай нарады праваахоўных органаў на транспарце.
Паколькі 11 красавіка на станцыі «Кастрычніцкая» быў здзейснены тэракт, у транспартнай пракуратуры прапаноўваюць арганізаваць сітуацыйны цэнтр па прыкладзе маскоўскага, дзе 24 гадзіны на суткі спецыялісты адсочваюць і аналізуюць дадзеныя, што атрымліваюцца з відэакамераў.
Таксама БТП выступае за ўвядзенне ў метро спецыяльнай сістэмы сувязі, якая можа працаваць пад зямлёй, дзе праходжанне радыёхваляў абцяжаранае і звычайныя радыёстанцыі неэфектыўныя.
Праз недахоп фінансаў на васьмі станцыях метро няма камер назірання
Цяпер камеры відэаназірання ёсць на 17 з 25 станцый сталічнага метро. Гэта «Кастрычніцкая», «Барысаўскі тракт» і «Уручча» па «Маскоўскай» лініі, а таксама ўсе станцыі па «Аўтазаводскай» лініі, паведамляе БелТА.
Як мага хутчэй неабходна ўсталяваць сістэмы відэаназірання на астатніх васьмі станцыях, заявіў беларускі транспартны пракурор Анатоль Дудкін. Па словах намначальніка метрапалітэна і галоўнага рэвізора па бяспецы руху Алега Круглова, абсталёўваць камерамі станцыі «Плошча Перамогі» і «Плошча Якуба Коласа» пачалі яшчэ ў 2009 годзе, але з-за праблемаў з фінансамі працы спыніліся на этапе падрыхтоўкі дакументацыі. «Плануецца ў гэтым годзе гэтыя дзве станцыі сіламі метрапалітэна абсталяваць прыладамі відэаназірання», — адзначыў ён.
Транспартная пракуратура лічыць, што неабходна «неадкладна вырашыць пытанне аб абсталяванні васьмі станцый «Маскоўскай» лініі метрапалітэна сучаснымі камерамі відэаназірання з іх высновай на два мультымедыйныя экраны ў аператыўна-дзяжурную службу АУС ўжо ў бягучым годзе».
