Заявы кіраўніка міністэрства фінансаў Расіі Аляксея Кудрына пра абмежаванні для працы расійскіх СМІ, што нібыта маюць месца ў Беларусі, не маюць нічога агульнага з рэальным становішчам і нічым не абгрунтаваныя. Аб гэтым заявіў міністр інфармацыі Беларусі Алег Праляскоўскі, каментуючы адпаведныя выказванні расійскага міністра фінансаў.
«Гэтыя заявы не маюць нічога агульнага з рэальным становішчам і нічым не абгрунтаваныя. Больш за тое, мы здзіўленыя, што падобныя папрокі гучаць менавіта з вуснаў міністра фінансаў, які, наколькі мне вядома, не адказвае за працу СМІ. Тым больш некарэктна пераводзіць гэтыя пытанні ў плоскасць эканамічнага супрацоўніцтва паміж дзвюма краінамі», — цытуе міністра інфармацыі Беларусі БелТА.
«У Беларусі няма ніякіх праблемаў для працы расійскіх сродкаў масавай інфармацыі, — сказаў Алег Праляскоўскі. — Усе журналісты, якія жадаюць асвятляць падзеі ў Беларусі, свабодна атрымліваюць акрэдытацыю пры міністэрстве замежных спраў, і для іх няма ніякіх абмежаванняў. Расійскія журналісты рэгулярна прысутнічаюць на ўсіх грамадска значных мерапрыемствах, у тым ліку з удзелам кіраўніка беларускай дзяржавы «.
«Калі спадару Кудрыну вядома аб нейкіх абмежаваннях або ціску ў Беларусі ў дачыненні да расійскіх журналістаў, няхай прадставіць канкрэтныя факты, і мы разгледзім гэтае пытанне па сутнасці. Аднак пакуль ніякіх афіцыйных прэтэнзій на гэты конт расійскі бок не вылучаў», — дадаў беларускі міністр.
Як ужо перадаваў Тэлеграф, віцэ-прэм’ер, міністр фінансаў Расіі Аляксей Кудрын заявіў, што Масква ўлічыць пазіцыю афіцыйнага Мінску па абмежаванні працы расійскіх СМІ пры крэдытаванні Беларусі. «Урад Расійскай Федэрацыі турбуюць меры адміністрацыі Беларусі па стрымліванні або абмежаванні сродкаў масавай інфармацыі з Расіі», — адзначыў кіраўнік мінфіна РФ.
