Паседжанне парламенцкай асамблеі "Усходняга партнёрства" (Еўранест) адклалі на нявызначаны тэрмін з прычыны рознагалоссяў еўрапарламентарыяў і парламентарыяў краін-партнёраў "Усходняга партнёрства" ў пытанні вызначэння складу беларускай дэлегацыі ў Еўранесце. Пра гэта паведамілі 30 сакавіка ў прэс-службе прадстаўніцтва Еўрасаюза ў Беларусі.
«Сумесна з высокім прадстаўніком ЕС Кэтрын Эштан і еўракамісарам Штэфанам Фюле Еўрапарламент падрыхтуе для Беларусі адмысловую «дарожную карту рэформаў». Ступень яе выканання і будзе крытэрам, па якім вызначыцца ўзровень уцягвання прадстаўнікоў беларускага парламента ў працу Еўранеста», — распавялі ў прэс-службе, перадае БелТА.
У сваю чаргу, як распавёў старшыня дэлегацыі Еўрапарламента ў Еўранесце Крысціян Вігенін, беларускае пытанне не павінна быць цэнтральным для парламенцкай асамблеі «Усходняга Партнёрства». «Мы павінны сканцэнтравацца на сутнасці «Усходняга партнёрства», у прыватнасці на парламенцкай адзнацы гэтай палітыкі», — адзначыў еўрапарламентарый.
Па папярэдняй дамоўленасці, парламенцкае вымярэнне «Усходняга партнёрства» Еўранест павінна ўключаць 120 дэпутатаў. 60 дэпутатаў будуць прадстаўляць Еўрасаюз, а па дзесяць дэпутатаў павінны высунуць краіны-партнёры «Усходняга партнёрства»: Беларусь, Азербайджан, Арменія, Грузія, Малдова і Украіна.
Аднак Еўрапарламент ставіць пад сумнеў легітымнасць беларускай парламенцкай дэлегацыі ў асамблеі ў выпадку, калі яна будзе прадстаўлена чальцамі Нацыянальнага сходу Беларусі (з 1996 гады Еўрапарламент не мае афіцыйных кантактаў з беларускім парламентам).
Раней Беларусі прапанавалі ўключыць у сваю дэлегацыю ў Еўранест па пяць прадстаўнікоў парламента і апазіцыі, аднак афіцыйны Мінск гэту ідэю не падтрымаў.
