Прэтэндэнт на пасаду прэзідэнта ад Аб'яднанай грамадзянскай партыі Яраслаў Раманчук лічыць, што Еўрапейскі саюз даў яшчэ адзін шанец прэзідэнту Беларусі Аляксандру Лукашэнку. Пра гэта патэнцыйны кандыдат заявіў пасля сустрэчы з міністрам замежных спраў Польшчы Радаславам Сікорскім і міністрам замежных спраў Германіі Гідо Вэстэрвеле, якая адбылася 2 лістапада ў Мінску.
«Афіцыйны Мінск атрымаў ад Еўрапейскага Саюза яшчэ адзін шанец. Ізноў гэта шанец авансам. Ізноў спачатку Аляксандр Лукашэнка атрымаў «еўрапейскія крэслы» з адтэрміноўкай аплаты», — заявіў Яраслаў Раманчук.
«Прэзідэнт Беларусі да дасканаласці адтачыў мастацтва раздачы абяцанняў Захаду і Расіі перад прэзідэнцкімі выбарамі. Ён настолькі пераканаўчы, што нават такія «ваўкі» еўрапейскай палітыкі, як Радаслаў Сікорскі і Гідо Вэстэрвеле паверылі і назвалі нашае сёння гістарычным момантам», — адзначыў патэнцыйны кандыдат у прэзідэнты.
Яраслаў Раманчук лічыць, што на сустрэчы, якая прайшла замежныя міністры казалі «правільныя словы пра свабодныя выбары, доступ да СМІ і захаванне правоў чалавека», але канкрэтных дзеянняў па канкрэтных праблемах да пэўных тэрмінаў ніхто не абяцаў, перадае сайт АДС.
Раманчук: еўрапейскі фактар у Лукашэнкі ў кішэні
«Склалася ўражанне, што еўрапейцы з’ехалі з пачуццём выкананага абавязку, а афіцыйны Мінск у чарговы раз загаварыў пра элегантную перамогу над Еўрасаюзам. Я разумею, што гэтая перамога — у выпадку невыканання беларускімі ўладамі дадзеных ЕС абяцанняў — будзе піравай, але да выбараў Аляксандар Лукашэнкі можа лічыць еўрапейскі фактар у кішэні», — лічыць беларускі палітык.
У сваю чаргу лідар кампаніі «Еўрапейская Беларусь» Андрэй Саннікаў, які таксама прэтэндуе на пасаду прэзідэнта, лічыць сустрэчу з міністрамі замежных спраў Германіі і Польшчы знакавай падзеяй. Пра гэта паведамілі ў прэс-службе апазіцыйнага палітыка.
«Гэта была знакавая сустрэча. Міністры замежных спраў дзвюх краін, якія традыцыйна праяўляюць вялікую цікавасць да Беларусі, прыехалі ў Мінск напярэдадні выбараў і сустрэліся з апазіцыяй. На сустрэчы стала зразумела, што ў нас няма разыходжанняў у разуменні сітуацыі ў краіне. Міністры ведаюць, што у нас груба парушаюцца правы чалавека, што ў апазіцыі няма доступу да СМІ, што ў турмах сядзяць палітвязні», — адзначыў Андрэй Саннікаў.
Саннікаў: ЕС скептычна ставіцца да пераконванняў Лукашэнкі
«Міністры замежных спраў распавялі, што Лукашэнка клятвенна запэўніваў іх у тым, што выбары пройдуць вельмі дэмакратычна, але да гэтых пераконванняў у Еўропе ставяцца скептычна, бо чуюць іх перад кожнымі выбарамі. Ёсць разуменне, што на выбарах адбудзецца чарговая фальсіфікацыя, і што беларусы будуць дамагацца рэалізацыі свайго права на сумленныя выбары», — заявіў апазіцыйны палітык.
У той жа час, па словах лідара «Еўрапейскай Беларусі», цяперашняя сітуацыя ў краіне «ўнікальная» і «дыктатура цалкам збанкрутавала». «Яна не спраўляецца з актуальнымі праблемамі — як палітычнымі, так і сацыяльнымі. Рэжым Лукашэнкі не змог знайсці адказаў на эканамічны крызіс і не здольны ўдзельнічаць у новых працэсах, якія адбываюцца ў нашым рэгіёне», — лічыць Андрэй Саннікаў.