Савет Бяспекі абяцае ўзмацніць барацьбу з вывазам паліва з Беларусі

09.06.2011 16:53
Архив

Дзяржаўны сакратар Савета бяспекі Беларусі Леанід Мальцаў 9 чэрвеня заявіў аб намеры ўладаў укараніць сістэму мер па абароне спажывецкага рынку ад неабгрунтаванага вывазу тавараў з Беларусі. Асаблівая ўвага будзе нададзена вывазу за мяжу аўтамабільнага паліва.

«У нас ёсць заканадаўства, у адпаведнасці з якім будуць прымяняцца ў тым ліку жорсткія, але вымушаныя меры. Нам трэба стабілізаваць сітуацыю, а не разгойдваць яе», — цытуе Леаніда Мальцава БелТА.

Дзяржсакратар Савета бяспекі запэўніў, што прыманыя меры будуць адпавядаць усім міжнародным нормам і абавязальніцтвам, якія Беларусь узяла на сябе ў двухбаковых і шматбаковых адносінах, у тым ліку ў рамках Мытнага саюза.

Леанід Мальцаў удакладніў, што ўзмацненне жорсткасці мер плануецца ўвесці толькі часова, пакуль сітуацыя ў эканоміцы Беларусі па ўсіх напрамках не будзе стабілізаваная.

«Тое, што спажывецкі рынак будзе абаронены, — гэта адназначна. І тое, што ступень абароны і ступень дзеяння мер будзе адпавядаць той абстаноўцы, якая складваецца, — гэта таксама адназначна. Сістэма будзе мяняцца ў залежнасці ад змены сітуацыі на рынку», — растлумачыў Леанід Мальцаў.

Як перадаваў Тэлеграф, у апошнія месяцы Беларусь сутыкнулася з ажыятажным попытам на аўтамабільнае паліва. Паводле афіцыйнай статыстыкі дзяржканцэрна «Белнафтахім», аб’ём рэалізацыі аўтамабільнага паліва, асабліва ў прыгранічных раёнах краіны, за апошнія два месяцы вырас ў разы.

У канцэрне гэта звязваюць з тым, што праз значную розніцу ў цэнах на аўтамабільнае паліва на ўнутраным рынку Беларусі і ў суседніх дзяржавах, а таксама праз дэфіцыт нафтапрадуктаў на ўнутраным рынку Расіі, аўтамабілісты з суседніх краін у вялікіх аб’ёмах скупляюць паліва на прыгранічных запраўках.

Часткова гэтым было выклікана істотнае падаражэнне бензіну і дызельнага паліва ў Беларусі. Так, з пачатку года бензін маркі «Нармаль-80» падаражэў на 77,8%. Кошт аднаго яго літра на 9 чэрвеня склала 4000 рублёў супраць 2250 рублёў на 1 студзеня. Істотна падаражэла і дызельнае паліва — на 72,5%. Калі ў пачатку года літр ДТ можна было купіць за 2580 рублёў, то цяпер — за 4450 рублёў.