Савет бяспекі Беларусі 19 кастрычніка плануе разгледзець праект новай рэдакцыі Канцэпцыі нацыянальнай бяспекі. Аб гэтым паведаміў прэзідэнт Беларусі Аляксандр Лукашэнка, адкрываючы пасяджэнне Савета Бяспекі. Па словах кіраўніка дзяржавы, гэта адзін з найбольш значных для ўстойлівага развіцця краіны дакументаў.
«Ён замацоўвае сутнасць і змест шматграннай дзейнасці па забеспячэнні балансу інтарэсаў асобы, грамадства і дзяржавы, па іх абароне не толькі ад патэнцыйных, але і рэальных пагрозаў», — падкрэсліў Аляксандр Лукашэнка.
Папярэдняя рэдакцыя канцэпцыі, зацверджаная ў 2001 годзе, паводле слоў прэзідэнта Беларусі, дастаткова поўна вызначала напрамкі дзяржаўнай палітыкі ў сферы нацыянальнай бяспекі, перадае БелТА. Яна стварала метадалагічную аснову пабудовы і функцыянавання сістэмы нацыянальнай бяспекі, адзначыў беларускі лідар.
Аднак Аляксандр Лукашэнка падкрэсліў, што змянілася геапалітычная рэальнасць і «адбываюцца ў свеце трансфармацыі, беспрэцэдэнтныя па маштабах і дынаміцы, прымушаюць па-новаму расстаўляць акцэнты». Менавіта гэта, па словах прэзідэнта, і абумовіла неабходнасць падрыхтоўкі новай рэдакцыі Канцэпцыі нацыянальнай бяспекі.