Сусветны банк гатовы падтрымаць Беларусь у правядзенні рэформаў сістэмы фінансавай справаздачнасці. Пра гэта заявіў кіраўнік цэнтра Сусветнага банка па рэфармаванні фінансавай справаздачнасці Джон Хегарці 27 красавіка на семінары-прэзентацыі вынікаў праграмы аб выкананні стандартаў і кодэксаў у бухгалтарскім уліку і аўдыце.
«Мы адзначаем моцныя бакі сістэмы фінансавай справаздачнасці Беларусі і зацікаўлены прасоўваць палітыку рэформаў у гэтым сектары, гатовыя ў далейшым аказваць падтрымку вашай краіне ў гэтым кірунку», — сказаў эксперт. Па словах Джона Хегарці, у Беларусі па меры планавання свайго развіцця «ў будучыні неабходна прымаць да ўвагі магчымыя змены ў міжнародных стандартах фінансавай справаздачнасці».
«Ніхто не кажа, што існую мадэль у вашай краіне трэба цалкам адпрэчыць,на нашу думку, неабходна яе перагледзець і ўдасканаліць. Калі вы хочаце рухацца далей, павінны разумець, якія магчымыя змены будуць у міжнароднай сістэме фінансавай справаздачнасці», — цытуе БелТА слова спецыяліста Сусветнага банка.
Прэзентуючы даклад Сусветнага банка «аб выкананні стандартаў і кодэксаў у бухгалтарскім уліку і аўдыце ў Беларусі», Джон Хегарці адзначыў, што прадстаўлена ацэнка патрабаванняў і практыкі ў вобласці фінансавай справаздачнасці, бухгалтарскага ўліку і аўдыту ў фінансавым сектары і сектары прадпрыемстваў.
У якасці арыенціраў у дакладзе выкарыстоўваюцца міжнародныя стандарты фінансавай справаздачнасці, стандарты аўдыту і заканадаўства Еўрапейскага саюза, а таксама міжнародны досвед і належная практыка ў вобласці рэгулявання фінансавай справаздачнасці, бухуліку і аўдыту для ацэнкі якасці фінансавай інфармацыі і прадстаўлення рэкамендацыяў у вобласці палітыкі.
У дакладзе падкрэсліваецца, што апошнія некалькі гадоў «вылучыліся ў Беларусі актыўнымі рэформамі: банкаўскі і страхавы сектары былі адкрыты для замежных фундатараў, працягваецца прыватызацыя, у рамках якой нядаўна быў прыняты план прыватызацыі і пераўтварэння дзяржпрадпрыемстваў у акцыянернае таварыства».
На думку эксперта Сусветнага банка, у Беларусі трэба працягваць удасканаленне законаў і ўстановаў, якія рэгулююць фінансавую справаздачнасць для таго, каб яна адпавядала зменлівым запатрабаванням рынку. Акрамя таго, неабходна ўмацаваць патэнцыял розных удзельнікаў працэсу фінансавай справаздачнасці па ўвядзенні міжнародных стандартаў, адзначае спецыяліст.
