Сустаршыня партыі "Беларуская хрысціянская дэмакратыя" (БХД) Павел Севярынец, каментуючы прызначэнне пазачарговай сесіі Палаты прадстаўнікоў на 7 верасня гэтага года, лічыць, што беларускі лідар "эксплуатуе нейкую шчаслівую дату". "Калі я не памыляюся, менавіта 7 верасня 2004 аб'яўлялася дата рэферэндуму па зняцці абмежаванняў на права балатавацца ў прэзідэнты", — сказаў палітык.
«Пытанне адно — абвяшчэнне даты прэзідэнцкіх выбараў. Выбары адбудуцца яшчэ да новага года. Мы ў сваёй дзейнасці зыходзім з гэтага пасылу — з 24 ліпеня Віталь Рымашэўскі (прадстаўнік аргкамітэта па стварэнні БХД — Тэлеграф) на паўтара месяцы адпраўляецца па рэгіёнах», — заявіў Павел Севярынец, перадае «Беларускі партызан».
Палітык лічыць таксама, што «ўлады да апошняга зацягнулі з абвяшчэннем прэзідэнцкай кампаніі з мэтай не даць падрыхтавацца да выбараў астатнім прэтэндэнтам і не даць Маскве часу на роздум».
«Не думаю, што Масква прыняла рашэнне мяняць Лукашэнку. Хутчэй за ўсё, вырашана загнаць Лукашэнку ў кут, каб потым выцягнуць з яго ўсё, што толькі можна», — адзначыў Павел Севярынец.
Як ужо паведамляў Тэлеграф, прэзідэнт Беларусі Аляксандр Лукашэнка падпісаў указ аб прызначэнні на 7 верасня гэтага года пятай пазачарговай сесіі Палаты прадстаўнікоў Нацыянальнага сходу чацвертага склікання.
Дэпутаты збяруцца для разгляду пытанняў парадку дня, вызначанай пастановай Палаты прадстаўнікоў Нацыянальнага сходу Рэспублікі Беларусь ад 30 чэрвеня.