Экс-спікер Вярхоўнага Савета Беларусі Станіслаў Шушкевіч лічыць, што калі б Беларусь была прававой дзяржавай, як гэта было па канстытуцыі да 1996 года, яна была б у лепшым становішчы, чым пры дзейным прэзідэнце Аляксандры Лукашэнку. "Шмат хто кажа, што палітыка Лукашэнкі прынесла стабільнасць, але такая стабільнасць утрымліваецца страхам", — заявіў Станіслаў Шушкевіч.
«І калі будзе абвал, то нам яшчэ трэба будзе перажыць шок і пераходны перыяд да нармальнай эканомікі. А пакуль гэта максімальнае напружанне пераважна на старых магутнасцях», — цытуе лідара Беларускай сацыял-дэмакратычнай партыі (Грамада) беларуская служба Deutsche Welle.
Кажучы аб пазітыўных і негатыўных наступствах кіравання Аляксандра Лукашэнкі, былы спікер Вярхоўнага Савета Беларусі звярнуў увагу на тое, што прамысловасць і сельская гаспадарка ў краіне развіваюцца старымі метадамі, няма лібералізацыі эканомікі, узрасла колькасць крэдытаў і агульная запазычанасць краіны.
«Нягледзячы на відавочнае ажыўленне беларускай эканомікі і краіны ў цэлым, яно несувымернае з ажыўленнем Літвы або Польшчы», — сказаў Станіслаў Шушкевіч.
Калі б у 1994 годзе падзеі развіваліся па іншым сцэнары, калі б Беларусь засталася «нармальнай прававой дзяржавай, як гэта было першапачаткова абвешчана, краіна была б у значна лепшым становішчы, чым пры цяперашнім кіраўніку», — адзначыў палітык.
«Я думаю, што першапачатковы перыяд быў бы для краіны больш складаным, таму што пераходзіць на прынцыпова новыя рэйкі ў эканоміцы, на прынцыпова іншую базу ў падатковай справе — гэта заўсёды азначае пагаршэнне становішча. У нас так і было спачатку, але мы збіраліся пераадолець цяжкасці па прыкладзе Польшчы, гэта значыць, прайсці стан шоку. Лукашэнка, у прынцыпе, ад гэтага шоку краіну пазбавіў, але пазбавіў і ад рэфармавання», — выказаў сваё меркаванне Станіслаў Шушкевіч.
