Усё дамовы, неабходныя для фармавання Адзінай эканамічнай прасторы краін-удзельніц Мытнага саюза, будуць рыхтавацца ў першачарговым парадку. Пра гэта паведаміў першы віцэ-прэм'ер Расіі Ігар Шувалаў па выніках арганізаванай у Маскве ў рамках пасяджэння Камісіі Мытнага саюза нарады па пытанні аб узгадненні праектаў пагадненняў, якія фармуюць дамоўна-прававую базу АЭП.
Ігар Шувалаў нагадаў таксама, што першапачаткова толькі частка праектаў пагадненняў па фармаванні АЭП насіла першачарговы характар. Ён таксама дадаў, што найбольшыя складанасці ўзнікаюць па распрацоўцы пагадненняў у нафтагазавай і энергетычнай сферах, перадае БелТА.
У сваю чаргу віцэ-прэм’ер Беларусі Андрэй Кабякоў адзначыў, што калі эксперты ў рамках сваіх паўнамоцтваў не змогуць ўзгадніць праекты пагадненняў, то канчатковае рашэнне па іх можа быць прынятая на сустрэчы прэм’ер-міністраў трох краін, якая запланавана на кастрычнік. «Разлічваем, што ўсе неабходныя пагадненні па АЭП будуць падпісаныя да новага года», — сказаў Андрэй Кабякоў.
Шувалаў адзначае неабходнасць зняцця бар’ераў для грузаперавозак у Мытным саюзе
Акрамя таго, па словах першага віцэ-прэм’ера Расіі, не ўсе нормы па перамяшчэнні тавараў і грузаў у рамках Мытнага саюза выконваюцца. «Неабходна ў найкарацейшыя тэрміны прыняць меры па ліквідацыі наяўных бар’ераў», — заявіў Ігар Шувалаў па выніках пасяджэння камісіі Мытнага саюза.
«Найбольш складаны з абмеркаваных пытанняў — гэта сітуацыя, якая складаецца ў цяперашні момант на мяжы паміж Расійскай Федэрацыяй і Рэспублікай Беларусь, Расійскай Федэрацыяй і Рэспублікай Казахстан. Камісія МС арганізавала праверкі з выездам на месца і пераканалася ў тым, з якімі складанасцямі сутыкаюцца грузаадпраўнікі з Рэспублікі Казахстан і Рэспублікі Беларусь на тэрыторыі РФ, а таксама як грузы з РФ перамяшчаюцца па тэрыторыі гэтых дзвюх дзяржаў МС, з якімі складанасцямі сутыкаюцца яны», — сказаў Ігар Шувалаў.
Па словах першага віцэ-прэм’ера Расіі, члены камісіі падрабязна вывучылі атрыманую падчас праверак інфармацыю. «Члены камісіі прыйшлі да высновы, што не ўсе нормы, якія былі прынятыя ў рамках стварэння Мытнага саюза, у цяперашні момант выконваюцца, нам неабходна правесці дадатковыя кантрольныя мерапрыемствы і ў самыя кароткія тэрміны зрабіць усё, каб гэтыя бар’еры былі адмененыя, і грузы перамяшчаліся па тым парадку, які узгоднены ў трохбаковым фармаце і забяспечваецца Мытным кодэксам», — цытуе Ігара Шувалава РИА «Новости».
Пры гэтым Ігар Шувалаў паведаміў, што члены камісіі прынялі адзінагалоснае рашэнне па пытанні змянення парадку ўвозу тавараў замежнымі грамадзянамі на тэрыторыю МС. У адпаведнасці з гэтым рашэннем, грамадзяне, якія прыязджаюць працаваць на тэрыторыю Расіі, Беларусі і Казахстана, змогуць правесці з сабой груз, звязаны з іх добраўпарадкаваннем на новым месцы, без выплаты мытных пошлінаў. «Мы такое рашэнне прынялі, і цяпер яно будзе аформлена належным чынам», — адзначыў першы віцэ-прэм’ер Расіі.
У сваю чаргу, першы віцэ-прэм’ер Казахстана Умірзак Шукееў паведаміў, што мытныя працэдуры за апошні час значна спрасціліся, але ў той жа час застаецца і шэраг пытанняў.
«Ёсць пэўныя нараканні і заўвагі да працы памежнай службы, мы дамовіліся, што з гэтай нагоды спецыяльна правядзем відэаканферэнцыю з удзелам нашых памежных службаў, з удзелам Мытнага камітэту, бізнэс-асацыяцый, каб гэтыя бар’еры зняць», — сказаў Умірзак Шукееў.
Дзевятнаццатае пасяджэнне Камісіі Мытнага саюза прайшло ў Маскве 20-21 верасня. У ходзе пасяджэння члены камісіі зацвердзілі шэраг нарматыўна-прававых актаў, прадугледжаных Мытным кодэксам. У прыватнасці, быў зацверджаны парадак кантролю, дэкларавання і карэкціроўкі мытнага кошту тавараў, інструкцыя пра асаблівасці запаўнення транзітнай дэкларацыі пры перамяшчэнні міжнародных паштовых адпраўленняў.
