Першы намеснік прэм'ер-міністра Уладзімір Сямашка заявіў, што беларускія торфабрыкетныя заводы ўступаюць ў залатую эру. Такое меркаванне ён выказаў 16 лютага ў ходзе пашыранага пасяджэння пастаяннай камісіі Палаты прадстаўнікоў па дзяржбудаўніцтве, мясцовым самакіраванні і рэгламенце, дзе абмяркоўвалася праграма працы Саўміна на 2011-2015 гады.
Дэпутат Анатоль Глаз падняў пытанне аб аднаўленні працы прадпрыемстваў па выпуску торфабрыкетаў, якія зачыніліся ў канцы 1990-х гадоў.
Уладзімір Сямашка ў сваю чаргу заявіў, што ў бліжэйшыя пяць гадоў для беларускіх торфабрыкетных прадпрыемстваў наступіць залатая эра. «Задача пяцігодкі — амаль два ў разы павялічыць здабычу торфу, выкарыстоўваць 161 аб’ект, з іх 32 міні-ЦЭЦ, астатнія — кацельні», — сказаў ён.
Сямашка: мінэнерга — багаты пакупнік
Гаворачы аб прадукцыі торфабрыкетных заводаў, першы намеснік міністра адзначыў, што мінэнерга з’яўляецца «багатым пакупніком, які плацежаздольны, гатовы браць торф і выпрацоўваць на ім энергію.»
Уладзімір Сямашка таксама нагадаў, што восем гадоў таму ў Беларусі працавала 42 торфабрыкетныя прадпрыемствы, прычым 80% іх — у страту. Па выніках 2010 года, адзначыў ён, у гэтай галіне няма ні адной стратнай арганізацыі. Паводле слоў віцэ-прэм’ера, для развіцця і мадэрнізацыі такіх заводаў кожны год накіроўваецца 40-50 млрд. рублёў (13,25 — 16,56 млн. даляраў), тросавыя экскаватары там цалкам замененыя франтальнымі пагрузчыкамі, а таму прадукцыйнасць працы вырасла ў разы тры. Акрамя таго, адзначыў Уладзімір Сямашка, заменены старыя гусенічныя трактары, мадэрнізаваны брыкетныя тросы, а таксама пачата вытворчасць прэсаў.
Новыя радовішчы вугалю асвояць няхутка
Уладзімір Сямашка паведаміў і аб магчымым засваенні новых радовішчаў сланцаў і бурага вугалю. У прыватнасці, канцэрн «Белнафтахім» павінен пачаць працы ў Жыткавіцкім і Петрыкаўскім радовішчах і на іх базе выпускаць сінтэтычнае вадкае паліва і іншыя прадукты перапрацоўкі, а мінэнерга — у Лоеўскім радовішчы высокакаларыйных бурых вуглёў. «Задача няпростая, не магу сказаць, што яна будзе вырашана ў межах адной пяцігодкі, але мы за яе ўжо ўзяліся», — паабяцаў віцэ-прэм’ер.
Так, у Лоеўскім радовішчы здабыча вугалю павінна здзяйсняцца шахтавым спосабам, што не практыкавалася раней у рэспубліцы. Патрабуецца правесці дадатковыя працы па выведцы такіх радовішчаў і вызначыць, якія тэхналогіі будуць выкарыстоўвацца для здабычы карысных выкапняў.
