"Слабыя" патэнцыйныя кандыдаты адказалі "моцным" Някляеву і Саннікаву

12.11.2010 17:27
Архив

У пятніцу, 12 лістапада, прэтэндэнты на пасаду прэзідэнта Беларусі Уладзімір Някляеў і Андрэй Саннікаў абвясцілі аб стварэнні палітычнага блока і прапанавалі іншым, на іх думку, больш «слабым» палітыкам далучыцца да іх саюзу. Астатнія апазіцыйныя кандыдаты па-рознаму пракаментавалі гэтую прапанову.

Прэтэндэнт ад Партыі БНФ Рыгор Кастусёў лічыць, што для таго, каб далучыцца да Уладзіміра Някляева і Андрэя Саннікава трэба ведаць, з чаго канкрэтна складаецца іх план дзеянняў, перадае «Беларускі партызан».

«Падзеі развіваюцца па сцэнары, апублікаваным яшчэ да выбараў. Гэтыя кандыдаты ўяўляюць адзін вектар далейшага развіцця Беларусі — усходні. У мяне ўжо былі сустрэчы з гэтымі кандыдатамі… Аб сумеснай дзейнасці на выбарах мы ўжо дамаўляліся з Някляевым ў свой час. На жаль, далейшыя адносіны ў нас не склаліся — не па маёй віне», — адзначыў Рыгор Кастусёў.

«Калі я прачытаў выказванні Далі Грыбаўскайце пра Лукашэнку, я быў вельмі расчараваны. Мы, апазіцыйныя прэтэндэнты, сустракаліся з ёй у літоўскай амбасадзе — тады гучалі зусім іншыя словы, процілеглыя цяперашнім. На жаль, апраўдваюцца асцярогі, што гэта пазіцыя не толькі Грыбаўскайце, але і пазіцыя некаторых іншых кіраўнікоў еўрапейскіх краін. І Беларусь паступова пераходзіць у сферу ўплыву Расіі. З гэтым я і звязваю сённяшнія заявы Някляева і Саннікава», — дадаў прэтэндэнт ад Партыі БНФ.

Рымашэўскі: ніякага жадання да іх далучацца

«Ніякага жадання да іх далучацца. Пакуль Саннікаў заяўляе, што дэмакратыю ў Беларусь прынясуць расійскія штыкі, пакуль у Някляева у праграме ёсць пункт аб інтэграцыі з Расіяй — ніякай гаворкі аб сумеснай дзейнасці быць не можа. Можам казаць аб канкрэтных рэчах: плошча, але плошча не маскоўская, а беларуская, праца на непрызнанне выбараў. Не думаю, што гэта аб’яднанне дасць нейкі эфект, за выключэннем ўзмацнення прарасійскага вектару ў беларускай палітыцы», — пракаментаваў прапанову прэтэндэнт ад незарэгістраванай партыі «Беларуская хрысціянская дэмакратыя» Віталь Рымашэўскі.

Статкевіч гатовы дамаўляцца з усімі альтэрнатыўнымі Лукашэнку кандыдатамі

Лідар Беларускай сацыял-дэмакратычнай партыі (Народная Грамада) Мікалай Статкевіч, па яго словах, гатовы дамаўляцца аб каардынацыі дзеянняў з усімі альтэрнатыўнымі дзейнаму прэзідэнту Аляксандру Лукашэнку кандыдатамі.

««Еўрапейская кааліцыя» ужо прапаноўвала каардынаваць сваю дзейнасць і прапаноўвала стварыць Раду дэмакратычных кандыдатаў, але Саннікаў чамусьці тады не падтрымаў гэтую ініцыятыву. Ну што ж: лепш пазней, чым ніколі», — адзначыў Мікалай Статкевіч.

Марголін: калі Раманчуку прапануюць, пярэчанняў з нашага боку не будзе

Кіраўнік выбарчага штаба прэтэндэнта ад Аб’яднанай грамадзянскай партыі Яраслава Раманчука Леў Марголін заявіў, што «калі Раманчуку прапануюць дамаўляцца, ніякіх пярэчанняў з нашага боку не будзе».

«Я ў вышэйшай ступені станоўча стаўлюся да рашэння двух кандыдатаў. Калі хутка стала ясна, што адзінага кандыдата не будзе, трэба зрабіць усё магчымае, каб не прыпадабняцца героям крылоўскай байкі, і хоць бы цягнуць воз ў адзін бок. Але сумесныя дзеянні — не проста сяброўства дамамі; павінен быць канкрэтны пералік сумесных дзеянняў. Мы гатовы дамаўляцца», — дадаў Леў Марголін.

Як раней паведамляў Тэлеграф, прэтэндэнты на пасаду прэзідэнта Беларусі Уладзімір Някляеў і Андрэй Саннікаў дамовіліся аб каардынацыі сваіх дзеянняў на будучых прэзідэнцкіх выбарах. «Па ўсіх даследаваннях, цяпер ёсць два наймацнейшыя лідары — Някляеў і Саннікаў. І цяпер два наймацнейшыя лідары аб’ядналіся. Са слабейшымі каардынацыі не атрымалася, прабачце», — адзначыў Уладзімір Някляеў.