Дзяржаўным рэспубліканскім СМІ загадана ў бліжэйшы час перадрукаваць матэрыял газеты Адміністрацыі прэзідэнта «Савецкая Беларусь», апублікаваны 14 студзеня пад назвай «За кулісамі адной змовы», піша партал «МЫ». Журналісты адзначаюць, што фільм Першага тэлеканала «Плошча. жалезам па шкле» паказалі таксама каналы на ОНТ і СТВ.
«Мяркуючы па ўсім, уладаў турбуе рэзананс ад прэзідэнцкіх выбараў у народзе — і яны імкнуцца ахапіць сваёй версіяй як мага больш беларусаў. Можна зрабіць выснову, што галоўны адрасат гэтых расследаванняў — менавіта грамадзяне нашай краіны. Па чутках, дыпламаты за мяжой крыху іншую карціну — прынамсі, падзей вечара 19 снежня ў цэнтры Мінску. Маўляў, руку прыклала Расія, а не Захад. Мэта — змякчэнне негатыўнай рэакцыі Еўропы», — піша выданне.
Як ужо перадаваў Тэлеграф, дзяржаўнае выданне «Савецкая Беларусь» 14 студзеня паведаміла аб тым, што па ўказанні прэзідэнта Беларусі Аляксандра Лукашэнкі ў рэдакцыю газеты былі перададзеныя для публікацыі рассакрэчаныя дакументы беларускіх спецслужбаў аб падзеях 19 снежня. У дакументах прыводзяцца дадзеныя аб замежным фінансаванні беларускай апазіцыі, у прыватнасці, былых кандыдатаў у прэзідэнты.
Інфармацыю, апублікаваную ў дадзеным матэрыяле «Савецкай Беларусі», абверглі лідар Ліберальна-дэмакратычнай партыі Сяргей Гайдукевіч, экс-кандыдаты ў прэзідэнты Яраслаў Раманчук і Рыгор Кастусёў, а таксама віцэ-прэзідэнт Міжнароднай федэрацыі правоў чалавека Алесь Бяляцкі.
У сваю чаргу, кіраўнік выбарчага штаба экс-кандыдата ў прэзідэнты Беларусі Уладзіміра Някляева Андрэй Дзмітрыеў заявіў, што збіраецца падаваць у суд на дзяржаўную газету «Савецкая Беларусь» за абразу гонару і годнасці лідараў кампаніі «Гавары праўду!»
Што тычыцца дыпламатычных прадстаўніцтваў Германіі і Польшчы, спецслужбы якіх дзяржаўнае выданне абвінаваціла ў дачыненні да падзей 19 снежня, то там не каментуюць дадзены артыкул. Так, у польскай амбасадзе ўстрымаліся ад каментароў да правядзення кансультацый з Варшавай, а ў дыпмісіі ФРГ заявілі, што «ніякага каментара не будзе».
