ГУУС Мінску ўзбудзіў крымінальную справу за махлярства ў асабліва буйным памеры ў дачыненні да 41-гадовага выхадца з Турцыі. Мужчына займаў ў знаёмых розныя сумы ў рублях, даларах і еўра і не вяртаў іх, прайграючы ўсё ў казіно. Агульная сума нанесенай шкоды склала 525 млн. рублёў.
У сярэдзіне 2009 года турак, які называў сябе Джоні, пачаў актыўна заводзіць знаёмствы ў коле заможных мінчукоў. Мужчына лёгка ўваходзіў у давер новых знаёмых, маляўніча апісваючы свае незлічоныя багацці і нерухомасць у Турцыі, Германіі, Іспаніі, а таксама распавядаючы пра свае планы заснаваць уласны гульнявы бізнэс у Беларусі, расказалі ў ГУУС Мінгарвыканкама.
Пад рознымі аргументамі — ад абяцанняў прыгнаць дарагі аўтамабіль да клятвенных запэўненняў са зніжкай дастаць абсталяванне для гульнявой залы — махляр перыядычна займаў у новых знаёмых буйныя сумы. Спачатку ён вяртаў пазычаныя грошы ў тэрмін. Аднак пасля, канчаткова ўвайшоўшы ў давер да людзей, перастаў гэта рабіць, прайграючы ўсе грошы ў сталічных казіно.
У цяперашні час па справе праходзяць трое пацярпелых: уладальніца салона пракату аўтамабіляў, якая аддала ашуканцу напавер 213 млн. рублёў, працаўнік казіно, які тым жа чынам пазбавіўся шасці тысяч даляраў, і індывідуальны прадпрымальнік, які «пазычыў» свайму турэцкаму таварышу 296 млн. рублёў. Як паведамляюць у мінскім ГУУС, спіс пацярпелых яшчэ можа папоўніцца.
На дадзены момант праваахоўнікі затрымалі аферыста. Яму пагражае да 10 гадоў пазбаўлення волі з канфіскацыяй маёмасці.
