Першая ў Беларусі перасовачная аўтазаправачная станцыя, па прагнозах, запрацуе да сярэдзіны лета пасля завяршэння сертыфікацыі. Пра гэта распавялі ў РУП "Беларуснафта-Віцебскаблнафтапрадукт". Плануецца, што сваю працу АЗС пачне ў Сенненскім раёне Віцебскай вобласці.
Перасоўная аўтазаправачная станцыя спраектаваная і рэалізаваная РУП «Беларуснафта-Віцебскаблнафтапрадукт» па даручэнні кіраўніка дзяржавы. Яна складаецца з трох ёмістасцяў па 5 куб.м паліва кожная, шасі МАЗ-МАН. Абслугоўвае станцыю аператар-кіроўца. Перасоўная АЗС працуе без знешняй крыніцы электраэнергіі, яна аўтаматызавана, абсталяваная кампутарам і мае магчымасць сувязі з базай, а таксама кнопку выкліку міліцыі, перадае БелТА.
Запраўка прапануе кіроўцам тры віды нафтапрадуктаў па безнаяўным і наяўным разліку: 80-ы, 92-ы бензін і дызельнае паліва, кошт якога не будзе адрознівацца ад коштаў стацыянарных АЗС. Такім чынам, выдаткі па дастаўцы нафтапрадуктаў кампанія бярэ на сябе.
Станцыя разлічана на сельскага аўтааматара, які жыве на адлегласці больш за 30 кіламетраў ад стацыянарных АЗС. Мабільнае новаўвядзенне дасць магчымасць РУП «Беларуснафта-Віцебскаблнафтапрадукт» па ўзгодненым з сельскімі саветамі па графіку наведваць такія населеныя пункты і аграгарадкі. Станцыя будзе працаваць па прынцыпе аўтакрамы і зможа абслужыць усіх ахвочых.
Рашэнне аб тым, колькі перасоўных АЗС у перспектыве з’явіцца ў Беларусі, ВА «Беларуснафта» прыме, зыходзячы з эканамічнай мэтазгоднасці, пасля таго, як першая станцыя будзе апрабавана на практыцы.
РУП «Беларуснафта-Віцебскаблнафтапрадукт» уваходзіць у структуру ВА «Беларуснафта», якое вядзе пошук, разведку і распрацоўку нафтавых радовішчаў, бурыць свідравіны, для здабычы нафты і спадарожнага нафтавага газу.
