У Беларусі ўстанаўліваецца абмежаванне доступу карыстальнікаў інтэрнэт-паслуг да інфармацыі, забароненай да распаўсюджвання ў адпаведнасці з заканадаўчымі актамі рэспублікі. Для гэтага ствараюцца два спісы абмежаванага доступу да сайтаў - публічны, у які ўвойдуць інтэрнэт-рэсурсы, зарэгістраваныя ў нацыянальным сегменце сеткі інтэрнэт, і закрыты, у які будуць уключаны іншыя "забароненыя" сайты.
Паводле новай пастановы аператыўна-аналітычнага цэнтра пры прэзідэнце Беларусі і міністэрства сувязі і інфарматызацыі, якая ўступіла ў сілу першага ліпеня 2010 года, пастаўшчыкі інтэрнэт-паслуг забяспечваюць аказанне паслуг па абмежаванні доступу на падставе спісу абмежаванага доступу, які фармуецца ў вызначаным парадку Дзяржаўнай інспекцыяй Рэспублікі Беларусь па электрасувязі міністэрства сувязі і інфарматызацыі (БелДІЭ), і спісу абмежаванага доступу, які фармуецца пастаўшчыком інтэрнэт-паслуг самастойна.
Для атрымання доступу да спісу БелДІЭ, пастаўшчыкам інтэрнэт-паслуг неабходна аформіць афіцыйны ліст і перадаць яго праз ўпаўнаважаную асобу на адрас інспекцыі. Акрамя гэтага інтэрнэт-правайдар абавязаны прадаставіць завераную ліцэнзію на права ажыццяўлення дзейнасці ў галіне сувязі, паведамілі ў БелДІЭ.
Пры наяўнасці гэтых дакументаў, на працягу трох дзён пасля паступлення запыту заяўнік атрымае лагін і пароль для доступу да спісу абмежаванага доступу праз сайт БелДІЭ. Уліковыя дадзеныя для доступу да спісу абмежаванага доступу носяць канфідэнцыйны характар.