Па дадзеных на 1 верасня 2010 года, у Беларусі праблемныя даўгі перад банкамі дасягнулі 319 млн. даляраў. Пры гэтым запазычанасць насельніцтва ўзрасла да 38 млн. даляраў, юрыдычныя асобы запазычылі — 281 млн. даляраў, паведамляе Нацыянальны банк Беларусі.
Праблемная запазычанасць насельніцтва па крэдытах у беларускіх рублях дасягнула 30 млрд. рублёў, павялічыўшыся на 26% з пачатку года, у тым ліку на 1,7% за жнівень. Аб’ём крэдытавання фізічных асобаў у нацвалюце вырас на 32,7% за восем месяцаў 2010 года, у тым ліку на 4,3% за жнівень — да 17,162 трлн. рублёў на 1 верасня, перадае АФН.
Праблемная запазычанасць па валютных крэдытах на 1 верасня 2010 года склала 28 млн. даляраў, што на 13,4% больш, чым на пачатак года. Пры гэтым за жнівень адзначана яе зніжэнне 2,1%. На 1 верасня 2010 рэшта валютнай запазычанасці насельніцтва перад банкамі знізілася да 774,9 млн. даляраў, што на 26,6% менш, чым на пачатак года. Скарачэнне тлумачыцца заканадаўчай забаронай крэдытавання фізічных асобаў у замежнай валюце, які дзейнічае з ліпеня 2009 года.
Доля праблемнай запазычанасці юрыдычных асобаў па крэдытах і іншых актыўных аперацыях павялічылася да 0,98% на 1 верасня 2010 года з 0,95% на пачатак года. Дадзены паказчык з’яўляецца максімальным для 2010 года, аднак значна ніжэйшым за ўзровень 2009 года — 1,71% (на 1 верасня 2009 года).
Па крэдытах у нацыянальнай валюце доля праблемнай запазычанасці склала 0,83% (супраць 0,90% на пачатак года), у замежнай — 1,33% (супраць 1,07% на пачатак года).
Агульная сума праблемнай запазычанасці (пралангаванай і пратэрмінаванай) на 1 верасня дасягнула 844,5 млрд. рублёў, павялічыўшыся на 28,4% з пачатку года. Аб’ём запазычанасці па крэдытах і іншых актыўных аперацыях павялічыўся з пачатку года на 24% да 85,7 трлн. рублёў.
