Урад Беларусі забараніў абарачэнне ў рэспубліцы біялагічна актыўных дабавак (БАД) да ежы без дзяржаўнай гігіенічнай рэгістрацыі. Дадзенае рашэнне прынята ў мэтах забеспячэння якасці і бяспекі харчовай сыравіны і харчовых прадуктаў для жыцця і здароўя чалавека. Забарона ўступае ў сілу праз тры месяцы пасля яе апублікавання.
Пачынаючы з 2003 года ў Беларусі забаронена абарачэнне БАД, якія змяшчаюць пэўныя рэчывы. Усе астатнія маглі рэалізоўвацца толькі пры наяўнасці на спажывецкай тары, этыкетках, у інструкцыях або рэкамендацыях па прымяненні, прыкладаных да кожнай адзінкі спажывецкай тары, неабходнай інфармацыі для спажыўца на беларускай ці расійскай мове.
Пры гэтым дзяржаўная гігіенічная рэгістрацыя БАДаў патрэбна была толькі ад іх вытворцаў у Беларусі. Усе астатнія дабаўкі маглі рэалізоўвацца і без рэгістрацыі, калі не супярэчылі ўстаноўленым забаронам, піша «Ежедневник».
Паводле рашэння ўрада, якое ўступае ў сілу праз тры месяцы, абарачэнне біялагічна актыўных дабавак да ежы будзе дапускацца толькі пры наяўнасці на іх пасведчанняў аб дзяржаўнай гігіенічнай рэгістрацыі. Пры гэтым рашэнне аб прылічэнні канкрэтных найменняў БАД да той ці іншай класіфікацыйнай групы будзе прымаць Міністэрства аховы здароўя.
Урад устанавіў таксама асобнае патрабаванне для дзяржаўнай гігіенічнай рэгістрацыі БАД, прызначаных для харчавання спартоўцаў. Для праходжання іх рэгістрацыі трэба будзе атрымаць узгадненне мінспорту, дзе будзе агаворана мэтазгоднасць выкарыстання ў харчаванні спартоўцаў тых ці іншых дабавак.
Акрамя таго, у Беларусі цяпер будуць забароненыя БАДы, у якіх утрымліваюцца органы і тканкі жывёлы і прадукты іх перапрацоўкі, якія з’яўляюцца спецыфічнымі матэрыяламі рызыкі прыёнавых захворванняў (трансмісіўная губкавая энцэфалапатыя). Забаронены дадаткова і дабаўкі, дзе ўтрымліваецца любая з частак цела багоўкі сямікропкавай (Coccinella septempunctata L.), скарпіёна (Scorpiones L.), шпанскай мушкі (Lytta sp.).
Уведзены і іншыя абмежаванні па ўтрыманні асобных кампанентаў расліннага і жывёльнага свету.
Адначасова з узмацненнем жорсткасці правілаў допуску БАДаў на беларускі рынак урад спрасціў умовы рэалізацыі дабавак, якія атрымалі рэгістрацыю. Так, выключаны абавязак прадаўцоў рэалізоўваць БАды праз аптэчныя пункты (шапікі) і спецыялізаваныя аддзелы ў крамах.
