У Мінску адбылася цырымонія ўручэння першай прафесійнай ўзнагароды "Залаты байт", на якой ўзнагародзілі ІТ-кампаніі, якія дасягнулі найбольшых поспехаў у сферы інфармацыйных тэхналогій. Узнагарода была прадстаўлена спецыяльна вырабленым памятным знакам, яе атрымалі лідары беларускага рынку ў распрацоўцы праграмных прадуктаў і рашэнняў за 2010 год.
Кампаніі ўзнагароджваліся ў пяці намінацыях. Найлепшым пастаўшчыком рашэнняў на ўнутраным рынку краіны прызнаная кампанія «Сістэмныя тэхналогіі», найлепшым замежным цэнтрам распрацоўкі — кампанія «Софтэк-Дэвелапмэнт». Лепшым экспарцёрам ПТВ назвалі кампанію «ЭПАМ Сістэмз», пераможцам у намінацыі «За найвышэйшую прадукцыйнасць працы» стала кампанія «Ронда», у намінацыі «За стварэнне новых працоўных месцаў» — «ЭПАМ Сістэмз».
Па словах дырэктара адміністрацыі Парку высокіх тэхналогій (ПВТ) Валерыя Цапкалы, ІТ-галіна ў Беларусі паспяхова і дынамічна развіваецца. «Мы з аптымізмам глядзім у будучыню, і я ўпэўнены, што ІТ-галіна будзе і далей паспяхова развівацца ў нашай краіне. Некаторыя называюць гэта эканомікай ведаў — гэта эканоміка, якую мы цяпер будуем», — цытуе яго БелТА.
Валеры Цапкала на ўрачыстай цырымоніі атрымаў спецыяльную ўзнагароду — ліст падзякі ад міністэрства адукацыі. Уручаючы ліст, кіраўнік ведамства Сяргей Маскевіч заявіў, што мінадукацыі мае намер падтрымліваць маладых людзей, якія хочуць атрымаць адукацыю ў ІТ-сферы. Міністр адзначыў, што Валеры Цапкала зрабіў значны ўнёсак у развіццё галіны — у прыватнасці, прапанаваў новыя ідэі, якія ў дадзены момант рэалізуюцца.
