У Гомельскай вобласці адталыя воды перамылі шэсць участкаў дарог і падтапілі 93 падворкі, 15 жылых і дачных дамоў, 23 сельскагаспадарчыя пабудовы ў 17 населеных пунктах Петрыкаўскага, Жыткавіцкага і Мазырскага раёнаў, а таксама ў пасёлку Прыдняпроўскі Рагачоўскага раёна. Эвакуацыя людзей і хатніх жывёл не патрэбная. У Віцебскай жа вобласці адзначаны першыя выпадкі падтаплення мастоў.
Як паведамілі ў Гомельскім абласным ўпраўленні МНС, у цэлым паводкавая сітуацыя ў Гомельскай вобласці застаецца стабільнай. Так, на рацэ Прыпяць у раёне вёскі Чэрнічы Жыткавіцкага раёна і горада Петрыкаў узровень вады за суткі знізіўся на адзін сантыметр, перадае БелТА.
На Заходняй Дзвіне ўзровень вады падняўся больш, чым на метр
Сакратар камісіі па надзвычайных сітуацыях пры Віцебскім аблвыканкаме Аляксандр Андрэеў на пасяджэнні камісіі па надзвычайных сітуацыях паведаміў, што рост ўзроўню вады ў рацэ Ардышэўка выклікаў падтапленне нізкаводнага аўтамабільнага моста каля вёскі Кучыншчына Лёзненскага раёна, перапыніўшы тым самым аўтамабільнае злучэнне з гэтым населеным пунктам. У Бешанковіцкім раёне паўстала пагроза затаплення нізкаводнага моста праз раку Улу паблізу яе ўпадзення ў Заходнюю Дзвіну, праз што будзе перапынена прамое аўтамабільнае і пешаходнае злучэнне з вёскай Ульянаўка. Па словах чыноўніка, падобныя сітуацыі ў гэтых месцах адбываюцца штогод, таму там загадзя арганізавалі лодачныя пераправы, людзі назапасіліся прадуктамі і медыкаментамі.
Алексндр Андрэеў распавёў, што на большасці рэк вобласці расце ўзровень вады на 10-84 сантыметры за суткі, у верхнім цячэнні Заходняй Дзвіны — на 100-130 сантыметраў. У цэлым жа разводдзе праходзіць спакойна, затораў лёду на рэках няма.
Для мінімізацыі наступстваў паводкі на Віцебшчыне сфармавалі сітуацыйныя штабы для каардынацыі дзеянняў, стварылі рэзерв харчовых і прамысловых тавараў першай неабходнасці ў аб’ёме каля 35 тон у раёнах магчымага падтаплення, падрыхтавалі 27 аб’ектаў для прыёму адсяляць грамадзян, вызначылі парадак арганізацыі ўсебаковага забеспячэння жыццядзейнасці насельніцтва. Таксама праводзіцца паветраная выведка паводкавай абстаноўкі з дапамогай авіятэхнікі «Беллесавія».
