Супрацоўнікі крымінальнага вышуку Чыгуначнага РАУС Гомеля, УУС Гомельскага аблвыканкама, галоўнага ўпраўлення крымінальнага вышуку крымінальнай міліцыі МУС у ходзе сумеснай аперацыі ў Гомельскай вобласці затрымалі банду рабаўнікоў, якія на трасе Брэст-Гомель здымалі груз з фураў проста падчас руху аўтамабіля. У дачыненні да злачынцаў ўзбуджана крымінальная справа па артыкуле 205 Крымінальнага кодэксу — крадзеж.
Уначы непрыкметны легкавы аўтамабіль бандытаў ўшчыльную прымыкаў да фуры, якая рухалася на хуткасці (часам на адлегласць да 20 сантыметраў), завадатар банды ўзломліваў замок або проста адкрываў засоў, расказалі ў прэс-службе УУС Гомельскага аблвыканкама.
Затым мужчына на хаду перадаваў напарніку скрыні і ўпакоўкі, якія, пасля таго як крадзенае перапаўняла легкавік, скідваліся ў яры пры дарозе. Зламыснікі даганялі аўтамабіль і працягвалі злачынства. Нарабаванае спрадавалася за паўцаны на рынках Гомелю.
Злачынцы, якімі аказаліся чацвёра жыхароў Украіны — мужчыны ва ўзросце ад 22 да 38 гадоў, — здымалі дом у пасёлку Краснае пад Гомелем. Пятым саўдзельнікам быў 29-гадовы жыхар Лепельскага раёна Віцебскай вобласці, які жыў ў Гомелі. У цяперашні час чацвёра з пяцёх злодзеяў арыштаваны і знаходзяцца ў следчым ізалятары. Аднаму з іх удалося ўцячы на тэрыторыю Украіны, абвешчаны яго вышук.
У Беларусі банда займалася злачыннай дзейнасцю з канца 2009 года, у асноўным на ўчастку ад Калінкавічаў да Гомелю. Асаблівую цікавасць злодзеяў выклікала прадукцыя брэсцкага прадпрыемства «Савушкін прадукт», Кобрынскага масласырзаводу, «Санта Брэмар». Супрацоўнікі міліцыі валодаюць інфармацыяй больш як пра дзесяць падобных фактаў.
