Супрацоўнікі Цэнтральнага РУУС Мінску затрымалі 19-гадовага мясцовага жыхара, якога падазраюць у асабліва буйным махлярстве. Па дадзеных следства, малады чалавек па інтэрнэце прапанаваў мужчыну купіць у яго 18 тыс. даляраў, але падчас угоды замест грашовых купюр падсунуў пакупніку нарэзаную паперу.
Пакупніка валюты прадпрымальны малады чалавек знайшоў па аб’яве ў інтэрнэце. Да ўгоды махляр старанна падрыхтаваўся: зняў кватэру, наняў праз інтэрнэт памагатую. Прычым для дзяўчыны ён прыдумаў іншую версія таго, што адбываецца, патлумачыўшы, што не хоча лішні раз «свяціцца» перад кліентам.
Незадоўга да ўмоўленай сустрэчы махляр звязаўся з пакупніком валюты і, спаслаўшыся на раптоўныя абставіны, прапанаваў абмяняць грошы праз дачку, якая знаходзіцца дома. Візіцёр прыехаў у азначаную кватэру на першым паверсе, перадаў дзяўчыне беларускія рублі, а тая па абяцаную валюту паспяшалася нібыта да змешчанага ў суседнім пакоі сейфа.
У суседнім пакоі дзяўчына праз акно перадала пакет з рублямі свайму наймальніку, а ад яго атрымала іншы пакет — з валютай для пакупніка. Падман выявіўся толькі, калі ў пакеце замест 18 тыс. даляраў выявілася нарэзаная папера.
Затрымалі зламысніка толькі праз два тыдні, за гэты час ён ужо паспеў выдаткаваць большую частку выкрадзенага, у ліку іншага набыўшы два аўтамабілі — BMW і Mazda.
Міліцыянты мяркуюць, што падазраваны можа быць датычны і да іншых ашуканскіх дзеянняў. У дачыненні да затрыманага распачалі крымінальную справу, за ўчыненае злачынства маладому чалавеку пагражае пазбаўленне волі на тэрмін ад трох да дзесяці гадоў з канфіскацыяй маёмасці.
