У Мінску адмянілі бясплатныя праязныя білеты для шматдзетных жанчын, узнагароджаных ордэнам маці. Аб гэтым паведаміла намеснік старшыні камітэту па працы, занятасці і сацыяльнай абароне насельніцтва Мінгарвыканкама Наталля Праскурава 2 сакавіка на прэс-канферэнцыі ў Мінску.
«Праязныя білеты для шматдзетных маці, узнагароджаных ордэнам маці, аплочваліся з гарадскога бюджэту. У ліпені 2010 года ўступіў у сілу закон «Аб мясцовым кіраванні і самакіраванні ў Беларусі», у адпаведнасці з якім цяпер гарсавет можа падтрымліваць толькі ветэранаў, пенсіянераў, інвалідаў і дзяцей. Калі шматдзетная маці не адносіцца да адной з гэтых катэгорый, то гарсавет не можа аказваць ёй падтрымку», — цытуе Наталлю Праскураву БелаПАН.
Па словах Чыноўніка, для таго, каб кампенсаваць адмену бясплатных праязных білетаў для шматдзетных маці, з ліпеня мінулага года было вырашана аплочваць бясплатны праезд на грамадскім транспарце школьнікам са шматдзетных сем’яў, дзе выхоўваецца пяцёра і больш дзяцей. Пры гэтым у першай палове снежня мінулага года бясплатны праезд атрымалі ўсе школьнікі, нагадала Наталля Праскурава.
«Пытанне аб бясплатных праязных квітках для шматдзетных маці можа быць вырашана толькі на рэспубліканскім узроўні. 16 сакавіка ў Мінску будзе арганізаваны семінар для Палаты прадстаўнікоў Нацыянальнага сходу, на якім старшыня Мінгарвыканкама Мікалай Ладуцька агучыць прапановы па ўнясенні змяненняў у заканадаўчыя акты на рэспубліканскім узроўні», — распавяла Наталля Праскурава. Пры гэтым яна не выключае, што ў іх ліку можа быць пытанне аб бясплатным праездзе на грамадскім транспарце для шматдзетных маці.
«Яшчэ адна праблема для шматдзетных маці — прызначэнне пенсій, — адзначыла чыноўніца. — Жанчына, у якой шмат дзяцей, вялікую частку свайго працаздольнага ўзросту знаходзіцца ў дэкрэтным адпачынку, даход у яе маленькі, у адпаведнасці з ім і пенсія атрымліваецца «мізэрнай».
Наталля Праскурава таксама канстатавала, што на сённяшні дзень у Мінску налічваецца 5,46 тыс. шматдзетных сем’яў, у апошнія гады іх колькасць зменшылася. З 2006 года прынята рашэнне аб уручэнні ордэна маці жанчыне, якая нарадзіла і годна выхавала пяць і больш дзяцей. За пяць гадоў па Мінску ўручана 362 ордэны маці, летась гэтую ўзнагароду атрымала 35 жанчын, нагадала яна.
