Транспартная міліцыя Беларусі прапаноўвае міністэрству транспарту і камунікацый ўзмацніць тэхнічны кампанент бяспекі на ўваходзе ў Нацыянальны аэрапорт "Мінск". Пра гэта 14 лютага заявіў начальнік УУС на транспарце міністэрства ўнутраных спраў Беларусі Вячаслаў Яўстаф'еў.
Ён нагадаў, што пасля тэракту ў аэрапорце «Дамадзедава» ў Маскве многія падраздзяленні міліцыі Беларусі перайшлі на ўзмоцнены рэжым працы. Па словах прадстаўніка МУС, у такім рэжыме праца працягваецца і цяпер, але галоўны акцэнт на транспартных аб’ектах будзе рабіцца на тэхнічныя сродкі бяспекі, перадае БелТА.
У прыватнасці, УУСТ просіць пашырыць выкарыстанне відэаназірання. Вячаслаў Яўстаф’еў адзначыў, што за 2010 год на чыгуначных аб’ектах усталявалі больш за 200 новых відэакамераў. Аднак, на думку начальніка транспартнай міліцыі, патрабуецца не толькі павялічваць іх колькасць, а замяніць сучаснымі лічбавымі камерамі аналагавыя. Прадстаўнік МУС праінфармаваў, што відэаапаратурай ужо абсталявалі частку вагонаў цягнікоў.
Транспартны пракурор Беларусі Анатоль Дудкін адзначыў, што на 2011 год запланавана ўсталёўка большай колькасці сучасных сістэмаў відэаназірання на трох станцыях сталічнага метрапалітэна. Транспартная пракуратура таксама просіць Мінгарвыканкам павялічыць у сувязі з гэтым фінансаванне — пераабсталяванне адной станцыі каштуе 650 млн. рублёў (215,4 тыс. даляраў).
Вячаслаў Яўстаф’еў, у сваю чаргу, паведаміў аб праблемах з прымяненнем кнопак трывогі ў дызель- і электрацягніках. Напрыклад, 14 лютага на прамую лінію, якую начальнік УУСТ праводзіў разам з транспартным пракурорам, патэлефанавала дзяўчына. Яна распавяла аб выпадку, калі пасажыры аднаго дызель-цягніка звязаліся з машыністам пры дапамозе кнопкі трывогі з просьбай выклікаць міліцыю, але праваахоўнікі так і не з’явіліся.
Начальнік УУСТ: міліцыя не прыбывае па выкліку ў прыгарадныя цягнікі
Таму транспартная міліцыя збіраецца арганізаваць праверкі і вучэнні па прымяненні кнопак трывогі, а таксама прааналізаваць наяўную сітуацыю. Вячаслаў Яўстаф’еў адзначыў, што нарады міліцыі не ў стане прысутнічаць у кожным дызель- ці электрацягніку, яны ёсць толькі ў 50% такіх саставаў. Аднак пасля сігналу ад пасажыраў супрацоўнікі правапарадку абавязаны прыбыць на бліжэйшую станцыю, і калі ў цягніку яны не з’явіліся, аб такіх выпадках трэба інфармаваць УУСТ.
Як ужо перадаваў Тэлеграф, міністэрства ўнутраных спраў Беларусі прыняло рашэнне ўзмацніць меры бяспекі на чыгуначным і паветраным транспарце ў сувязі з выбухам у маскоўскім аэрапорце «Дамадзедава», здзейсненым 24 студзеня каля 15:40 па беларускім часе.
