Прадстаўнікі амбасады РФ, якія прысутнічалі 1 сакавіка на пасяджэнні суда па справе двух расійцаў Арцёма Брэуса і Івана Гапонава, абвінавачаных ва ўдзеле ў масавых беспарадках 19 снежня ў Мінску, заявілі, што ў расійскага боку "ёсць шмат пытанняў па гэтым працэсе". Разам з тым якіх-небудзь афіцыйных заяў прадстаўнікі амбасады Расіі вырашылі не рабіць да вынясення прысуду.
«Важны той факт, што працэс мае адкрыты характар. На пасяджэнні могуць прысутнічаць дыпламаты, вольная беларуская прэса. І пераканацца ў адсутнасці доказнай базы і надуманасці абвінавачання», — цытуе дарадцу амбасады Вадзіма Гусева «Камсамольская праўда ў Беларусі».
«Мы настойваем на вызваленні расійскіх грамадзян. Наша пазіцыя не мяняецца, яна была неаднаразова выказаная міністрам замежных спраў Расіі Сяргеем Лаўровым і прэзідэнтам Дзмітрыем Мядзведзевым», — дадаў дарадца пасольства.
Як раней перадаваў Тэлеграф, на чарговым паседжанні суда, якое адбылося 1 сакавіка, з расійцаў Арцёма Брэуса і Івана Гапонава не знялі прад’яўленых раней абвінавачанняў ва ўдзеле ў масавых беспарадках у Мінску ў дзень прэзідэнцкіх выбараў. Ім па-ранейшаму ставіцца ў віну «ўдзел у несанкцыянаваным мітынгу, знішчэнне маёмасці, узброены супраціў» і пагражае ад трох да васьмі гадоў пазбаўлення волі.
Каб даць падсудным час азнаёміцца з новым абвінавачаннем, суд абвясціў перапынак у слуханнях да 10 сакавіка. Акрамя таго, па хадайніцтве пракурора да справы далучаныя новыя дакументы, у тым ліку вынікі медэкспертызы аб прызнанні шэрагу супрацоўнікаў міліцыі пацярпелымі.
