Рыжскі порт на дадзены момант не мае адпаведнай інфраструктуры, каб перавальваць буйныя транзітныя партыі нафты, якія Беларусь закупляе ў Венесуэле. У любым выпадку для перавалкі такой колькасці нафты латвійскаму порту спатрэбіцца новы тэрмінал, бо існыя не валодаюць патрэбнымі магутнасцямі. Пра гэта паведаміў кіраўнік Рыжскага порта Леанід Логінаў.
Кіраўнік порта падкрэсліў, што прапанова аб транзіце нафты прагучала на ўзроўні ідэі, перадае Telegraf.lv са спасылкай на Dienas Bizness.
«Ніхто не сказаў, што ўжо заўтра беларусы прыйдуць у Рыжскі порт і пачнуць прапампоўваць праз яго мільёны тон венесуэльскай нафты. Падчас візіту ў Рыгу міністр замежных спраў Беларусі проста пацікавіўся, ці магчыма нешта падобнае ў Рызе. Яму адказалі, што ў прынцыпе нічога немагчымага няма», — сказаў Леанід Логінаў.
Як раней паведамляў Тэлеграф, старшыня праўлення порта і віцэ-мэр Рыгі Айнар Шлесерс заяўляў, што Рыжскі свабодны порт гатовы прыняць частку венесуэльскай нафты для Беларусі і забяспечыць перавалку 10 млн. тон сыравіны. Па словах спецыяліста, гэта магло б забяспечыць значныя фінансавыя ўліванні ў латвійскую эканоміку. Порт мог зарабіць на перавалцы нафты каля 10 млн. даляраў, а дзяржава ў цэлым — да 150 млн. даляраў.
