У Асацыяцыі беларускіх банкаў паведамілі, што ў цяперашні час праект указа аб Банку развіцця Рэспублікі Беларусь ужо падрыхтаваны і ўнесены на разгляд Савета міністраў. Папярэдне міністэрства фінансаў сумесна з міністэрствам эканомікі і Нацбанкам разгледзеў прапановы Асацыяцыі беларускіх банкаў, якія былі ўлічаны ў выніковым праекце.
Праектам указа прадугледжваецца стварэнне падначаленага Саўміну рэспубліканскага ўнітарнага прадпрыемства «Банк развіцця Рэспублікі Беларусь». Банк будзе функцыянаваць у асноўным за кошт бюджэтных сродкаў, перадае БелТА.
Сярод ініцыятыў па функцыянаванню стваранага банка, агучаных экспертамі Асацыяцыі беларускіх банкаў, прапаноўваецца, каб крыніцай уласных сродкаў банка сталі пазабюджэтныя фонды фінансавання інавацый, бюджэтныя сродкі, што выдзяляюцца на развіццё эканомікі краіны, а таксама іншыя крыніцы фармавання рэсурснай базы. Эксперты лічаць неабходным, каб дзейнасць банка будавалася на самаакупальнасці і імкненні мабілізаваць прыватны айчынны і замежны капітал.
Эксперты асацыяцыі таксама перакананыя, што дзейнасць новага фінансавага інстытуту павінна быць субсідыярнай, гэта значыць дапаўняць дзейнасць камерцыйных банкаў. Па словах спецыялістаў, зыходзячы з прынцыпу субсідыярнасці, пры выдачы крэдытаў у рамках вялікіх праграмаў са значнай колькасцю крэдытаатрымальнікаў мэтазгодна прадугледжваць падключэнне камерцыйных банкаў. Гэта стане інструментам стварэння дзяржаўна-прыватных партнёрстваў.
У выніку стварэння Банка развіцця, а таксама адпаведнага змены сістэмы фінансавання дзяржпраграм, плануецца знізіць кошт крэдытных рэсурсаў за кошт мінімальнай маржы. Новы фінансавы інстытут, на думку экспертаў, таксама дазволіць фінансаваць дзяржаўныя праграмы па прыярытэтных напрамках, у тым ліку накіраваных на сацыяльна-эканамічнае развіццё, падтрымку развіцця малога і сярэдняга бізнэсу, экспартаарыентаваных праектаў.
У праекце ўказу таксама прадугледжваецца надзяленне банка паўнамоцтвамі на ажыццяўленне аперацый па прыцягненню, абслугоўванні і пагашэнні знешніх дзяржаўных пазык і знешніх пазык, прыцягнутых пад гарантыі беларускага ўрада. Мэтай гэтага з’яўляецца мабілізацыя замежнага капіталу.
