У Смаргоні двое маладых хлопцаў, якія знаходзіліся ў стане алкагольнага ап'янення, спрабавалі выклікаць прыхільнасць да сябе прадстаўніцы прыгожага полу нестандартным спосабам — з дапамогай кулакоў. "Выкарыстоўваючы ўстойлівую фразу — "ёсць закурыць?" — І не атрымаўшы станоўчага адказу, юнакі ўзяліся збіваць дзяўчыну", — расказалі ва УУС Гарадзенскага аблвыканкама.
Па словах старшага следчага СА ПР Смаргонскага РАУС маёра міліцыі Сяргея Голубева, пацярпелая не так даўно перабралася ў Беларусь з Расіі, набыла дом, куды, уласна, і вярталася ў той вечар.
На шчасце, дзяўчына паспела выклікаць міліцыю. Маладыя людзі кінуліся бегчы, але неўзабаве па прыкметах іх затрымалі супрацоўнікі патрульна-паставой службы міліцыі. Абодва фігуранты гісторыі раней ужо былі судзімыя.