Квіткі на XIX Міжнародны фестываль мастацтваў "Славянскі базар у Віцебску" паступяць у продаж чацвёртага чэрвеня, паведаміў 28 траўня дырэктар Цэнтра культуры "Віцебск" — дырэктар дырэкцыі міжнароднага фестывалю мастацтваў Радзівон Бас, па словах якога кошт квіткоў на канцэрты і іншыя мерапрыемствы фэсту застанецца на леташнім узроўні.
Напрыклад, на канцэрты ў Летнім амфітэатры квіткі будуць каштаваць ад 10 да 350 тыс. рублёў (самыя дарагія — на гала-канцэрт адкрыцця). Дадаткова ў горадзе адкрыюцца пяць білетных касаў. Тым, хто жыве за межамі Віцебску, набыць квіткі будзе нескладана — іх можна замовіць па тэлефоне. Заяўкі ўжо паступілі з Брэста, Магілёва, Гомелю і з расійскіх Рудні, Вялікіх Лукаў, Пскову.
«Выкарыстанне інтэрнэту для продажу квіткоў пакуль немагчыма ў сувязі з тым, што ўсе прададзеныя квіткі ўлічваюцца падатковымі органамі, а падаткавікі пакуль не гатовыя да ўліку электронных продажаў», — растлумачыў Радзівон Бас.
Бас: На «Славянскім базары» будуць толькі тыя артысты, якія здольныя сабраць залі
На XIX Міжнародным фестывалі мастацтваў «Славянскі базар у Віцебску» будуць толькі артысты, здольныя сабраць залі, заявіў сёння на прэс-канферэнцыі дырэктар дырэкцыі міжнароднага фестывалю мастацтваў Радзівон Бас, перадае БелТА.
«Ёсць артысты добрыя, мы іх любім, шануем, але ім трэба адпачыць. Мы запрасілі артыстаў, здольных сабраць залі», — сказаў Радзівон Бас. Дзмітры Хварастоўскі, Райманд Паўлс, Юры Антонаў, Ларыса Доліна, Стас Міхайлаў, Аляксандр Сяроў, Валерыя, Дзіма Білан — вось далёка не поўны пералік яркіх талентаў, якія выступяць у гэты раз на сцэне Летняга амфітэатра. Прычым канцэрты на фэставай пляцоўцы пачнуцца за два дні да ўрачыстага старту, які азнамянуе гала-канцэрт. Па традыцыі на фэсце пройдуць Дні мастацтваў Беларусі, Расіі, Украіны, адбудуцца Дзень Саюзнай дзяржавы і Дзень Масквы. А вось Італія падорыць Віцебску «Італьянскую ноч» — пад такой назвай запланаваны канцэрт з удзелам папулярных Аль Бана, Джулиа, Тоні Эспазіта, Рыкарда Фольі.
У фестывальную кудасу ўнясуць інтрыгу дарослы і дзіцячы конкурсы выканаўцаў эстраднай песні. Беларусь на міжнародным конкурсе выканаўцаў эстраднай песні «Віцебск- 2010» будзе прадстаўляць Дзяніс Вершанка — уладальнік Гран-пры міжнароднага фэсту-конкурсу сцэнічнага мастацтва «На высокай хвалі-2009» (РФ), ад Расіі заяўлена гранд-прызёрка Ганна Малышава, прызнаная лепшай на Усерасійскім конкурсе-фестывалі эстраднага мастацтва ім. Б.Брунова.
На дзіцячым песенным конкурсе за Беларусь выступяць Злата Ларанка і Аня Зайцава.
Арганізатары фэсту не забыліся і пра выкшталцоную публіку. Для музычных гурманаў выступяць Ніна Катамадзэ і гурт «Insight», джаз-кабарэ Сяргея Скрыпкі і кабарэ-бэнд «Серебряная свадьба». Знатакі вакальнага мастацтва, несумненна, будуць удзячныя за сольныя канцэрты Дзмітрыя Хварастоўскага і Сяргея Захарава. Не засталіся без падарунку і тэатралы. Для іх свае спектаклі прывязуць Маскоўскі тэатр на Паўднёвым захадзе, Санкт-Пецярбургскі дзяржаўны моладзевы тэатр на Фантанцы. Ну а Святлана Кручкова будзе чакаць сваіх прыхільнікаў на творчым вечары.
У кінапраграме «Славянскага базару» беларускія, расійскія і ўкраінскія фільмы. Вядомая акторка Вера Глаголева прывязе ў Віцебск сваю рэжысёрскую працу — фільм «Адна вайна».
Па словах Радзівона Баса, сёлетні фэст абяцае быць дынамічным і высокатэхналагічным. Дынамічнасць вызначаць яго ўдзельнікі — таленавітыя і крэатыўныя, а тэхналагічнасці дадасць сцэнаграфія, выкананая са святлодыёдных сетак. На флагштоках будуць развівацца сцягі 30 дзяржаў. Прычым славянскія дзяржавы прадстаўлены амаль поўным складам, гэтым разам няма толькі Славеніі.
Как вам новость?
Выбор читателей