Пасол Украіны ў Беларусі Раман Бязсмертны заявіў, што Кіеў не прызнае існавання 134 млн. даляраў доўгу Украіны перад Беларуссю. "Беларусь звязвае пытанне доўгу, які ўтварыўся падчас распаду СССР, з пытаннем мяжы. Гэта асноўная перашкода для абмену ратыфікацыйнымі граматамі", — сказаў украінскі дыпламат.
Пры гэтым ён заявіў, што Украіна не мае намеру аплочваць доўг, які ёй прад’яўляе Мінск. «Украінскі бок не бачыць магчымасці адказваць за тое, чаго не існуе, і за прадпрыемствы, якія належалі былому СССР», — сказаў амбасадар і дадаў, што Беларусь і Украіна, тым не менш, працягваюць кансультацыі па гэтым пытанні, перадае Корреспондент.net.Нагадаем, у чэрвені Бязсмертны ў інтэрв’ю газеце «Зеркало недели» заяўляў, што Украіна згодная выплаціць Беларусі 134 млн. даляраў для таго, каб разблакаваць працэс ратыфікацыі ўкраінска-беларускай дамовы аб дзяржмяжы.У перыяд распаду СССР беларускія прадпрыемствы пастаўлялі прадукцыю ва Украіну, якая не была аплачаная. Мінск лічыць, што дадзены доўг абавязана аплаціць Украіна, а Кіеў лічыць, што дадзены доўг быў створаны ў перыяд СССР і аплаце не падлягае.Дамова аб дзяржаўнай мяжы была падпісана ў 1997 годзе і ў той жа год ратыфікавана Украінай. Беларусь жа на працягу 13 гадоў блакавала яе ратыфікацыю. Мінск патрабаваў, каб спачатку Кіеў пагасіў доўг украінскіх гаспадарчых суб’ектаў перад Беларуссю, назапашаны да 1992 года.
