Савет міністраў сваёй пастановай № 842 ад другога чэрвеня 2010 года пашырыў спіс тавараў, для набыцця якіх грамадзяне могуць атрымаць ільготныя крэдыты, паведамілі сёмага чэрвеня ва ўрадзе. Дадзены дакумент уносіць змены ў існую пастанова Савета міністраў ад першага жніўня 2009 года № 1010.
«Пералік тавараў, пры куплі якіх беларускія грамадзяне змогуць выкарыстаць ільготныя крэдыты, уключае шырокі асартымент прадукцыі айчыннай вытворчасці. У прыватнасці, гэта бытавая тэхніка: тэлевізары, DVD-прайгравальнікі, прыстаўкі лічбавага наземнага тэлебачання, пыласосы і мікрахвалевыя печы, маніторы, лядоўні і маразільнікі, электра-і газавыя пліты», — расказалі ў Саўміне.
У спіс тавараў уключаны ацяпляльныя катлы і электраводанагравальнікі беларускай вытворчасці. Пры куплі пральных машын, кухонных машын, посуду фарфора-фаянсавага, дываноў, дывановых пакрыццяў, мэблі і шпалераў айчыннага вытворцы таксама можна будзе выкарыстоўваць ільготныя крэдыты.
У зацверджаны Саўмінам пералік таксама ўвайшла тэхніка (міні-трактары, мапеды і матацыклы, мотаблокі, прычэпы), адзенне (у тым ліку верхняе), галаўныя ўборы і абутак беларускай вытворчасці.
Згодна з пастановай ільготнае крэдытаванне можна будзе выкарыстоўваць для набыцця шэрагу будаўнічых матэрыялаў — дзвярных і аконных блокаў, гіпсакардонных вырабаў, падлогавай дошкі, ДСП, жалезабетонных і бетонных вырабаў, сантэхкерамікі, дахавых матэрыялаў, піламатэрыялаў, кафлі, сухіх будаўнічых сумесяў, шкла, сценавых будаўнічых матэрыялаў, паліўных брыкетаў, цэменту і многага іншага.
