У Мінску пры падтрымцы АБСЕ 11 кастрычніка пачнуцца падрыхтоўчыя курсы для 25 прадстаўнікоў беларускай міліцыі. Удзельнікі трэнінгу будуць ўдасканальвацца ў сучасных метадах навучання паліцыі. Інструктарамі на пяцідзённых курсах стануць два паліцэйскія з Венгрыі, паведамілі ў офісе АБСЕ ў Мінску.
«Добрае навучанне супрацоўнікаў паліцыі з’яўляецца асновай прафесійнай паліцэйскай службы», — адзначыў кіраўнік офісу АБСЕ ў Мінску амбасадар Бенедыкт Халер.
«Гэтыя курсы накіраваны на падтрымку працы Беларусі па паляпшэнні дзейнасці праваахоўнай службы ў адпаведнасці з міжнароднымі стандартамі шляхам укаранення сучасных метадаў навучання паліцыі, уключаючы метадалогію навучання праз дыялог, дзе асноўнай дзеючай асобай з’яўляецца не выкладчык, а навучэнец», — дадаў Бенедыкт Халер.
Курсы былі арганізаваны з дапамогай Аддзелу па стратэгічных пытаннях дзейнасці паліцыі Сакратарыяту АБСЕ. Навучанне беларускіх міліцыянтаў праходзіць у рамках працы АБСЕ па ўдасканаленні дзейнасці паліцыі з мэтай умацавання нацыянальных сістэм прававога правасуддзя.
