Супраць грамадзяніна Азербайджана сталічная міліцыя ўзбудзіла крымінальную справу па ч. 2 арт. 371-2 КК (Парушэнне правілаў знаходжання ў Рэспубліцы Беларусь і правілаў транзіту праз тэрыторыю краіны) за тое, што ён двойчы пасля дэпартацыі нелегальна вяртаўся ў краіну. Пра гэта паведаміў прэс-афіцэр Кастрычніцкага РУУС Сяргей Чабатароў.
«Для наведвання Беларусі два гады назад у 49-гадовага азербайджанскага грамадзяніна прычына была больш чым важкая — у 22-гадовай дачкі выявілі рак лёгкіх, і дзяўчыне неабходна было кваліфікаванае лячэнне. Па прыездзе замежнік легальна зарэгістраваўся ў сваіх знаёмых на трохмесяцовы тэрмін, пакуль дачка праходзіла патрэбныя працэдуры. З жыллём у Мінску дапамаглі тыя ж знаёмыя, знайшлася і праца — рамонт патрыманых аўтамабіляў», — расказаў прадстаўнік праваахоўных органаў.
Пасля таго як курс лячэння і час рэгістрацыі скончыліся, дзяўчына з’ехала дахаты, а яе бацька вырашыў застацца ў Беларусі. «Зарабляў ён істотна больш, чым у родным Азербайджане. На нелегальным становішчы замежніку ўдалося прабыць некалькі месяцаў, пакуль яго не затрымалі супрацоўнікі Кастрычніцкага РУУС», — паведаміў прэс-афіцэр.
За пратэрмінаваную рэгістрацыю азербайджанца прыцягнулі да адміністрацыйнай адказнасці па артыкуле 23.55 КААП («Парушэнне правілаў знаходжання ў Рэспубліцы Беларусь»). «Мужчына спакойна заплаціў невялікі штраф і… не з’ехаў. У выніку літаральна праз месяц быў ізноў затрыманы, прыцягнуты да адміністрацыйнай адказнасці і дэпартаваны з краіны», — расказаў Сяргей Чабатароў.
«Прыйшоў час, калі дачцэ спатрэбілася ў Мінск на наступны курс лячэння. Разам з ёй, не гледзячы на пяцігадовую забарону, прыехаў і бацька, — падкрэсліў прэс-афіцэр Кастрычніцкага РУУС. — Пасля выпіскі, як і ў першы раз, дзяўчына пакінула нашу краіну, а вось мужчына зноў застаўся».
Неўзабаве мужчыну зноў затрымалі і паўторна дэпартавалі з Беларусі. «Гэтым разам з улікам папярэдніх парушэнняў супрацоўнікамі міліцыі ён быў суправоджаны да самай мяжы. Але і гэта не дапамагло. На мінулым тыдні паўднёвец у чарговы раз нелегальна прыбыў у нашу краіну, але літаральна адразу быў затрыманы супрацоўнікамі міліцыі», — адзначыў Сяргей Чабатароў.
Як паведаміў прэс-афіцэр, зараз замежнік «мае ўсе шанцы затрымацца ў нас на тэрмін да трох гадоў, праўда, на некалькі іншых умовах».
Как вам новость?
Головоломки
Выбор читателей
