Ацэнка арганізацыі судовых працэсаў абвінавачаных ва ўдзеле ў масавых беспарадках 19 снежня 2010 года з боку міжнародных экспертаў павінна быць аб'ектыўнай і ўзважанай. Пра гэта 11 сакавіка на сустрэчы з членамі місіі БДІПЧ АБСЕ заявіў намеснік старшыні Вярхоўнага суда Беларусі Валеры Калінковіч.
Як паведамілі ў Вярхоўным судзе на сустрэчы з Валерам Калінковічам Бюро па дэмакратычных інстытутах і правах чалавека Арганізацыі па бяспецы і супрацоўніцтве ў Еўропе (БДІПЧ АБСЕ) прадстаўлялі кіраўнік дэпартамента па правах чалавека Сняжана Бакуліч, эксперт па пытаннях правоў чалавека Віктар Петэр Улам, а таксама намеснік начальніка ўпраўлення агульнаеўрапейскага супрацоўніцтва, начальнік аддзелу АБСЕ і Рады Еўропы МЗС Беларусі Аляксандр Апімах.
Намеснік старшыні Вярхоўнага суда асабліва падкрэсліў, што любыя пазасудовыя ацэнкі вынікаў разгляду крымінальных спраў «варта расцэньваць як ціск на суд, што недапушчальна». Валеры Калінковіч растлумачыў, што ацэнка акалічнасцяў канкрэтнай крымінальнай справы і вынясенне рашэння па дадзенай справе, заснаванага на законе Беларусі, з’яўляецца выключна кампетэнцыяй суда.
У Вярхоўным судзе таксама паведамілі, што эксперты БДІПЧ АБСЕ выказалі жаданне плённа супрацоўнічаць з Вярхоўным судом. Валеры Калінковіч, у сваю чаргу, падтрымаў гэтую прапанову.