Супрацоўнікі аддзелу крымінальнага вышуку Савецкага РУУС Мінску затрымалі раней судзімую 56-гадовую мясцовую жыхарку, якая пад выглядам зняцця сурокаў выкрадала ювелірныя вырабы і грошы ў даверлівых грамадзян. Аператыўнікі пакуль усталявалі два факты махлярства з боку затрыманай — на тэрыторыі Савецкага і Першамайскага раёна.
«Выхапіўшы з натоўпу ахвяру (як правіла, маладую дзяўчыну), зламысніца пераканана распавядала, што «небараку» сурочылі. Для зняцця сурокаў неабходна правесці адмысловы абрад, для якога патрэбныя, напрыклад, залатыя ўпрыгожанні дзяўчыны. Далей ішлі таямнічыя маніпуляцыі і загадкавыя замовы. Толькі па заканчэнні некаторага часу дзяўчына разумела, што яе абдурылі», — распавяла прэс-афіцэрка Савецкага РУУС Вольга Яскевіч.
Тых, хто таксама стаў ахвярай махляркі, міліцыя просіць звяртацца ў дзяжурную частку Савецкага РУУС па тэлефоне 292-02-02. Канфідэнцыяльнасць гарантуецца.