Алімпійскаму чэмпіёну Аляксею Грышыну прызначылі імянную стыпендыю ў памеры 200 тарыфных ставак першага разраду, што ў наш час складае 16,2 млн. рублёў у месяц. Пра гэта паведамілі 24 сакавіка на калегіі міністэрства спорту і турызму, прысвечанай вынікам выступу беларускай зборнай на Алімпіядзе ў Ванкуверы
Імянную стыпендыю фрыстайліст Аляксей Грышын будзе атрымліваць з 25 лютага 2010 года да 24 лютага 2014 года. Такая ж стыпендыя прызначана і галоўнаму трэнеру нацыянальнай каманды па фрыстайле Мікалаю Казеке, паведамляе БелТА.
Акрамя таго, прысуджаны стыпендыі ў памеры 100 тарыфных ставак (каля 8,1 млн. рублёў) фрыстайлістцы Асоль Слівец, якая заняла на Гульнях-2010 чацвёртае месца, старшаму трэнеру нацыянальнай зборнай па фрыстайле Васілю Вараб’ёву, біятланістам Дар’і Домрачавай і Сяргею Новікаву, галоўнаму трэнеру мужчынскай каманды па біятлоне Аляксандру Папову, галоўнаму трэнеру жаночай каманды па біятлоне Андрыяну Цыбульскаму, а таксама трэнеру-масажысту беларускай зборнай Ягору Шамшуру.
Па выніках зімовай Алімпіяды-2010 Беларусь заваявала тры медалі (адзін залаты, адзін срэбны і адзін бронзавы) і разам са Славакіяй падзяліла 17-е месца па якасці ўзнагарод. Па агульнай колькасці медалёў беларусы з Аўстраліяй, Славакіяй, Славеніяй і Харватыяй паказалі 19-ы вынік.
У Ванкуверы ўпершыню за час выступу Беларусі самастойнай камандай быў заваяваны залаты медаль зімовай Алімпіяды. Акрамя таго, беларусы ўпершыню здолелі здабыць больш за дзве ўзнагароды на Белых гульнях.