Пасля правядзення дэвальвацыі беларускага рубля практычна ўсе замежныя банкі ў суседніх краінах перасталі каціраваць нацвалюту Беларусі. Так, у Латвіі не каціруюць беларускія рублі такія банкі, як Citadele Banka, Baltikums Banka, Trasta komercbanka, Latvijas Biznesa Banka. Раней у краінах-суседзях можна было абменьваць беларускія рублі на іншыя валюты.
Так, латвійскі Rietumu Banka, які яшчэ ў панядзелак, 23 траўня, гатовы быў ажыццяўляць валютна-абменныя аперацыі з безнаяўнымі беларускімі рублямі па курсе 7000 беларускіх рублёў за даляр (9882 за еўра), з 24 траўня не праводзіць аперацыі ні з гатоўкай, ні з безнаяўнымі беларускімі рублямі.
Тыя нешматлікія банкі, якія яшчэ гатовыя прадаваць беларускія рублі, пры наяўнасці попыту, усталёўваюць істотна завышаныя курсы на яе, у параўнанні з афіцыйным курсам Нацбанка.
Так, латвійскі SEB banka гатовы прадаваць даляры па курсе 9110 — 9190 беларускіх рублёў за даляр. Купля даляраў за беларускія рублі 25 траўня банкам ажыццяўляецца па курсе 3 956,35 рубля.
Пры гэтым афіцыйныя курсы Нацбанка Беларусі на 25 траўня складаюць 4931 рубель за даляр, 6 933,48 рубля за еўра.
Між тым, пасля дэвальвацыі беларускага рубля яго афіцыйны курс у суседняй Расіі ўмацаваўся амаль на 54%. Калі кошт 10 тыс. беларускіх рублёў, усталяваны Цэнтрабанкам Расіі на 23 траўня, за дзень да правядзення дэвальвацыі, складаў крыху больш за 88,7 расійскага рубля, то пасля дэвальвацыі, 25 траўня, курс апусціўся амаль на 54% да 57,6 расійскага рубля за 10 тыс. беларускіх рублёў. Між тым, мяркуючы па наяўнай інфармацыі, большасць расійскіх банкаў, як і ў суседняй Латвіі, беларускую валюту не каціруе.
Афіцыйны курс беларускага рубля ў Украіне, паводле статыстыкі Нацбанка Украіны, пасля дэвальвацыі ўмацаваўся на 56,2%. Тым не менш, большасць камерцыйных банкаў краіны нацвалюту Беларусі таксама не каціруюць.
Як паведамляў Тэлеграф, 24 траўня Нацбанк правёў дэвальвацыю беларускага рубля і вярнуў абмежаванне на курсаўтварэнне. Цяпер гранічныя значэнні абменных курсаў, па якіх могуць ажыццяўляцца купля-продаж і канверсія замежнай валюты на пазабіржавым рынку і рынку наяўнай замежнай валюты не могуць адрознівацца ад курса Нацбанка больш чым на +/-2% (пры канверсіі — ад крос-курсу, разлічанага на аснове афіцыйных курсаў беларускага рубля да адпаведных валют). Пасля дэвальвацыі рубля камерцыйныя банкі Беларусі адкарэктавалі курсы, усталяваўшы іх на максімальна дапушчальным узроўні.
