На інаўгурацыі Аляксандра Лукашэнкі, у чацверты раз абранага прэзідэнтам Беларусі, не будуць прысутнічаць журналісты. Тым не менш, цырымонію будуць трансляваць па тэлебачанні ў прамым эфіры. Плануецца, што інаўгурацыя пройдзе ў Палацы рэспублікі ў Мінску 21 студзеня, аднак улады афіцыйна не аб'яўлялі аб даце цырымоніі.
Па традыцыі падчас цырымоніі інаўгурацыі прэзідэнта абраны кіраўнік дзяржавы прыносіць прысягу ва ўрачыстай абстаноўцы ў прысутнасці дэпутатаў Палаты прадстаўнікоў, членаў Савета рэспублікі, суддзяў Канстытуцыйнага, Вярхоўнага і Вышэйшага гаспадарчага судоў, перадае БелаПАН.
Уступаючы на пасаду прэзідэнта, абраны кіраўнік дзяржавы ўрачыста клянецца «верна служыць народу Рэспублікі Беларусь, паважаць і ахоўваць правы і свабоды чалавека і грамадзяніна, выконваць і абараняць Канстытуцыю Рэспублікі Беларусь, свята і добрасумленна выконваць ускладзеныя на мяне высокія абавязкі».
Як раней перадаваў Тэлеграф, аб магчымай даце інаўгурацыі Аляксандра Лукашэнкі паведаміў сакратар ЦВК Беларусі Мікалай Лазавік. Згодна з Канстытуцыяй краіны цырымонія інаўгурацыі новага прэзідэнта павінна прайсці не пазней, чым праз два месяцы пасля правядзення выбараў, то бок не пазней за 19 лютага.
