Пасля паказанага на расійскім рэгіянальным ТБ сюжэт пра "напад" НАТО на Беларусь з тэрыторыі Ўкраіны з тэлекампаніі "Липецкое время" па ўласным жаданні звольніліся трое журналістаў. Заявы пра сыход з пасадаў падалі дырэктарка тэлекампаніі Алена Дзергунова, галоўная рэдактарка Ірына Якаўлева і аўтарка сюжэту, спецкар Наталля Мельнікава.
Па словах крыніцы «Коммерсанта» ў рэгіянальнай уладзе, журналісты вырашылі звольніцца пасля сустрэчы з губернатарам Ліпецкай вобласці Алегам каралёвым, аднак самі фігуранткі скандалу і цяперашняе кіраўніцтва тэлекампаніі гэту сувязь не каментуюць.
«Яны напісалі заявы пра звальненне па ўласным жаданні. Пра прычыны і акалічнасці такога рашэння я нічога сказаць не магу, усе пытанні да заснавальнікаў», — заявіла в. а. дырэктара кампаніі «Липецкое время» Таццяна Голева.
Не растлумачылі сітуацыю і прадстаўнікі заснавальніка тэлекампаніі — абласной адміністрацыі, перадае NEWSru.com. У сваю чаргу, Алена Дзергунова пасля звальнення папрасіла не даваць прэсе яе каардынаты, а Алена Якаўлева заявіла, што «не будзе гуляць у гэтыя гульні», і адключыла тэлефон.
Звяз журналістаў Расіі: у МУС ёсць каласальныя праблемы ў інтэлектуальным развіцці
Тым часам Звяз журналістаў Расіі заявіў пра пачатак праверкі сітуацыі са скандальным сюжэтам. Па словах сакратара арганізацыі Міхаіла Фядотава, «калі пацвердзіцца сувязь паміж адстаўкамі на канале і сюжэтам пра вучэнні», ЗЖР абавязкова прыме меры.
«Калі журналісты сапраўды пераказвалі легенду вучэнняў МУС, дык гэта кажа пра каласальныя праблемы ў інтэлектуальным развіцці нашага МУС, а не пра тое, што журналістаў трэба караць», — адзначыў прадстаўнік расійскага звяза журналістаў.
