Звольнены журналіст Дарафееў з'язджае з Беларусі

06.06.2011 10:17
Архив

Звольнены з тэлеканала ОНT журналіст Сяргей Дарафееў, які раней працаваў вядучым ток-шоў "Выбар", мае намер у бліжэйшы час пакінуць Беларусь. "Я ўжо вельмі хутка з'язджаю. Але я не хацеў бы пакуль казаць пра гэта. Так, гэта іншая краіна, дзе я буду жыць і працаваць. Як доўга - не ведаю", - паведаміў ён.

Журналіст адзначыў, што яму і раней паступалі прапановы працаваць за мяжой. «Я быў упэўнены, што калі нарадзіўся тут, то і жыць і працаваць павінен тут. Але цяпер у мяне магчымасцi працаваць тут няма. Па суб’ектыўных і аб’ектыўных прычынах. Таму — папрацую ў іншай краіне, павучуся чамусьці новаму», — заявіў Сяргей Дарафееў, перадае «Еўрапейскае радыё для Беларусі».

«Я пастараюся, каб мая пазіцыя як вядучага, як рэдактара, наогул — як журналіста, была ў іншай краіне, таксама, як і ў Беларусі, максімальна аб’ектыўнай і палітычна нейтральнай. Я выдатна разумею, што ў любой краіне ў кожнага мас-медыя ёсць уладальнік, ёсць пэўная зацікаўленасць, магчыма — лобі. Але ніхто не адмяняў прынцыпаў брытанскай журналістыкі, згодна з якімі ўсе мы навучаліся, стандартаў ВПС і амерыканскай журналістыкі. Я б не хацеў казаць кніжныя фразы аб неабходнасці нейтральнасці. І пастараюся адпавядаць гэтым крытэрам не толькі ў Беларусі, але і за яе межамі», — сказаў тэлевядоўца.
 
Ён таксама распавёў, што пасля эфіру 19 снежня 2010 года ён не займаўся грамадска-палітычнай журналістыкай. «Гэтай тэматыкі не было, у адпаведнасці з маімі новымі службовымі інструкцыямі», — падкрэсліў ён.

Як ужо перадаваў Тэлеграф, Сяргея Дарафеева адхілілі ад працы 20 снежня. Кіраўніцтва тэлеканала «выказала незадаволенасць» тым, як журналіст напярэдадні вёў прамы эфір праграмы, прысвечанай вынікам прэзідэнцкіх выбараў.

У ходзе прамога эфіру ток-шоў «Выбар», які адбыўся праз некалькі гадзін пасля закрыцця выбарчых участкаў, старшыня Цэнтрвыбаркама Беларусі Лідзія Ярмошына, прысутная на праграме, пакінула студыю, заявіўшы потым, што Сяргей Дарафееў яе «дастаў«.

Журналіст, акрамя таго, у ходзе ток-шоў прасіў чыноўнікаў адказаць, чаму насельніцтву нельга сабрацца на плошчы ўвечары 19 снежня і чаму апазіцыянерам не дазволілі дзяжурыць на выбарчых участках у начны час.

Пасля гэтай праграмы кіраўніцтва тэлеканала адправіла Сяргея Дарафеева ў адпачынак, а праекты «Выбар» і «Выбар+» у эфір больш не выходзілі. Аляксандр Лукашэнка, кажучы аб апошнім выпуску перадачы «Выбар», назваў Сяргея Дарафеева «маладым журналістам, якога трэба паставіць на месца».