У гэтым годзе гарадскі выставачны праект «Мастак і горад» адкрыецца 27 мая на пешаходнай вуліцы Камсамольскай і будзе прысвечаны творчасці народнага мастака Беларусі Леаніда Шчамялёва.
«Мастак і горад» – гэта выстаўка ў фармаце public space, якая дазваляе жыхарам і гасцям нашай краіны бліжэй пазнаёміцца з выдатнымі сучаснымі беларускімі мастакамі. Праект 10-ы год запар радуе мінчан і гасцей сталіцы; таксама за час свайго існавання выстаўка двойчы прыязджала ў Віцебск і адзін раз у Брэст – да 1000-годдзя горада.
У экспазіцыі бягучага года 34 работы, якія прадстаўляюць творчасць Леаніда Шчамялёва з 1960-х да пачатку 2000-х гадоў. У аснове вобразнай сістэмы творчасці Шчамялёва – чысты, светлы, звонкі каларыт і музычная гармонія мяккіх ліній. Да адкрыцця выстаўкі работы, якія будуць экспанавацца на Камсамольскай, можна паглядзець у віртуальнай галерэі на сайце праекта higminsk.by.
Як жывапісец Леанід Шчамялёў працаваў не толькі ў майстэрні – уся краіна была для яго рабочай пляцоўкай. Па душэўнаму складу мастак адносіў сябе да падарожнікаў. Шчамялёў аб’ездзіў з эцюднікам і альбомам практычна ўсе рэспублікі былога Савецкага Саюза: калясіў па Крайняй Поўначы і поўдні, быў на Каўказе і ў Сярэдняй Азіі, наведаў шэраг краін Далёкага Усходу і Еўропы.
– Леанід Дзмітрыевіч пісаў свет такім, якім яго бачыў і ўяўляў. І кожны ў шчамялёўскім свеце можа знайсці і ўбачыць сваё, блізкае яго душы і сэрцу, – незалежна ад прафесіі, узросту, сферы інтарэсаў, – расказала дырэктар Музея гісторыі горада Мінска Галіна Ладзісава.
У гонар 10-годдзя «Мастака і горада» арганізатары правялі экскурс у гісторыю праекта: на мальбертах у дворыку гарадской мастацкай галерэі Л. Д. Шчамялёва на дзень былі размешчаны фатаграфіі і тэкставае апісанне выставак папярэдніх гадоў.
Ролю праекта ў папулярызацыі беларускага мастацтва адзначыла Вольга Жукава, начальнік аддзела рэкламы, грамадскіх сувязей і маркетынгу банка ВТБ (Беларусь), які з’яўляецца генеральным партнёрам выстаўкі на працягу васьмі гадоў:
– «Мастак і горад» пакарае тым, што ён адкрыты для кожнага. Ён блізкі да работніка, што спяшаецца ў офіс, да мамы з дзецьмі, якая выйшла на вуліцу, да шумнай кампаніі сяброў. Ён – частка гарадской прасторы, гэта і ёсць самае каштоўнае.
Выстаўка будзе даступная для жыхароў і гасцей сталіцы да 20 верасня. Традыцыйна рэпрадукцыі карцін будуць суправаджацца біяграфіяй аўтара і тэкставым апісаннем на трох мовах – беларускай, рускай і англійскай.
Праект рэалізуецца Музеем гісторыі горада Мінска сумесна з камунікацыйнай кампаніяй GBS пры падтрымцы Мінскага гарадскога выканаўчага камітэта. Восьмы год запар генеральным партнёрам экспазіцыі выступае банк ВТБ (Беларусь).
