Мінскі камерны хор Salutaris прэзентаваў першы ў Беларусі музычны кліп, запісаны ва ўмовах сацыяльнай дыстанцыі і з захаваннем мер бяспекі

16.06.2020 15:30
Музыка Видео

Музыкі выканалі твор Марэка Рачыньскага "Gaudeamus Omnes" (Узрадуемся ўсе). Са слоў заснавальніка і мастацкага кіраўніка хора, Вольгі Янум: гэта музыка надзеі, што хутка ўсё скончыцца і мы зноў будзем разам рабіць нешта вельмі прыгожае і натхняльнае.

Здымкі праходзілі ў канцы мая на Мінскім моры. Як бачна з відэа, удзельнікі калектыву стаяць на адлегласці каля двух метраў адзін ад аднаго. Сам гук быў запісаны ў працэсе здымак кліпа.

Рэжысёр кліпа і крэатыўны дырэктар хору Дзяніс Жыгуноў распавёў: «З сакавіка хор прыпыніў рэпетыцыі, але жыць без харавых спеваў удзельнікам было складана, таму яны, вывучыўшы фактары небяспекі, зрабілі невялікую сустрэчу на беразе Мінскага мора, захоўваючы дыстанцыю і нават зрабіўшы аўдыё-відэа запіс аднаго з твораў. Атрымалася нядрэнна. Вядома, па водгуках удзельнікаў, падчас такой «адносна бяспечнай рэпетыцыі» чуць розныя харавыя партыі аказалася даволі складана, бо хор расцягваецца ў выніку ў лінію працягласцю 30 і больш метраў».

Камерны хор Salutaris — незалежны музычны калектыў, быў заснаваны ў 2007 годзе, за больш чым 10 гадоў паспеў наведаць дзясяткі краін і стаць пераможцам і прызёрам розных міжнародных конкурсаў.