Як і ў мінулых гульнях сэзону гэтых жа каманд, у суботу вынік аказаўся буйны (дагэтуль перамогі чаргаваліся: 6:1, 3:6, 6:2, 2:5). Прыемна, што другую перавагу запар ў тры шайбы для таронтаўцаў у гульнях з канкурэнтамі на ўсе часы стварыла рускамоўная тройка беларуса Грабоўскага. Ва ўсіх пяці шайбах беларускі форвард прымаў непасрэдны ўдзел: тры разы асыставаў партнёрам, аднойчы адзначыўся сам ды яшчэ раз пільнаваў «пятак» пры выніковай гульні ў бальшыні (выніковы паказчык «плюс-мінус» +1 тлумачыцца тым, што два разы «клёны» вызначаліся ў большасці, а яшчэ адна шайба была закінута ў момант, калі быў выкарыстаны адкладзены штраф).
Спакойны спачатку ход сустрэчы з невялікай колькасцю кідкоў даволі нечакана выліўся на 8-й хвіліне ў гол Мікалая Кулеміна (1+2): Грабоўскі пабароўся на блакітнай лініі каля борта за шайбу, праціснуўшы яе далей, адкуль Аляксей Панікароўскі перавёў гульню ў зону перад варотамі на адкрытага патрнёра, які ў адзін дотык адкрыў лік у матчы.
Не паспелі каманды змяніць пяцёркі пасля гола першага, як, дзякуючы памылцы галкіпера Галака, адкрыў лік сваім галам у сустрэчы ўжо і беларус: стрэліўшы амаль ад борта з вельмі вострага вугла.
З нерадасных падзей у гэтых галах для беларускіх заўзятараў адзначым, што абодва разы на лёдзе знаходзіўся Андрэй Касціцын (з паказчыкам «мінус 2» ён сустрэчу і скончыў). Паведамлялася раніцай у дзень гульні, што ён на лёдзе не зявіцца наогул і будзе назіраць за гульнёй з прэс-боксаў. Аднак Боб Гэйні вырашыў па-іншаму: Андрэй правёў на лёдзе 14 хвілін 16 секунд і 3 разы бросіў па варотах.
Нервовасць і важнасць выніку ў гэтай сустрэчы для абедзвюх каманд не магла не сказацца: напрыканцы перыяду ўжо пасля сырэны стварылася куча-мала з усіх байцоў, што знаходзіліся тады на лёдзе. Як вынік 5 выдаленняў: 2 — у гасцёў, 3 — у гаспадароў.
Магчыма, гэта перавага ў адно выдаленне і стала вырашальнай у выніку: таронтаўцы, дзякуючы гэтаму захапілі ініцыятыву на пачатку другой паловы і дыктавалі ўмовы аж да першай шайбы «канадцаў» у сустрэчы. А да таго часу ажно двойчы паспеў адзначыцца трэці прадстаўнік рускамоўнай тройкі — Панікароўскі (2+2). Спачатку на 24-й хвіліне ён з сярэдняй дытсанцыі пасля паса з-за спіны Грабоўскага стрэліў паміж ног брамніка, выкарыстаўшы адкладзены штраф. А на 30-й хвіліне «клёнавыя лісты» упершыню у гульні рэалізавалі і колькасную перавагу: Грабоўскі, якога манрэальская публіка вітала знакамітым заакіянскім «Бу-у-у!», і Кулемін вывелі на кідок Кубіну — украінскі форвард добра згуляў на падборы.
Ажыла манрэальская публіка пасьля гола Максіма Ляп’ера (2+0, 7 кідкоў за сустрэчу). Акрамя крыху ўжо надакучыўшага «Бу-у-у!» у накірунку беларуса яна ўспомніла і сваю каманду. Вылілася гэта ў скарачэнне ліку да дзвюх шайбаў і некалькі невыкарыстаных кідкоў з добрых пазіцый напрыканцы перыяда, калі на лаўцы аштрафаваных знаходзіўся Джэйсан Блэйк. Працягвалі «канадцы» ціснуць і тую хвіліну, што каманды гралі ў роўных скаладах. Таронтаўцы выстаялі. Аднак быў яшчэ трэці перыяд.
Ды вось трэцяя частка працягам ціску «канадцаў» ня стала. Перапынак крыху збіў парыў гаспадароў, а пятая шайба ў іх вароты увогуле усё расставіла па сваіх месцах. Гэта ў большасці адзанчыўся Блэйк, дапамогшы зарабіць асыстэнцкі хет-трык Грабоўскаму, які прайшоў па цэнтры ў зону паміж супернікаў і аддаў налева партнёру.
Стомлены і, здаецца, нават крыху напужаны і разгублены «Манрэаль» (вочы Алекса Тэнгуэя ў першым перапынку, калі ў яго бралі кароткае інтэрв`ю, блукалі ў разгубленасці ў не даючых вынікаў пошуках) на другі штурм у гэтай сустрэчы быў ужо ня здольны: цалкам заслужаная перамога гасцей.
Калі ў складзе «канадцаў» няма Сяргея Касціцына, то Міхаіл Грабоўскі можа гуляць у хакей супраць свайго мінулага клуба — думка, якая сама сабой узнікае пры параўнанні сустрэч «беларускіх» канадскіх клубаў НХЛ.
Тэкст: Дзяніс Талпека