Бойка за месца ў плэй-оф выходзіць на фінішную прамую. Засталося два тыдні да выяўлення ўдзельнікаў самай цікавай часткі сезону. І таму кожны дзень спіс каманд, для якіх любая памылка можа стаць вырашальнай ці якія ўжо яе зрабілі, павялічваецца. Пасля хатняй перамогі над «Таронта» «Бафала» Ліндзі Рафа, які ўзначальвае «шабляў» з 1997 году (вечнасць па мерках настаўнікаў!), паехаў у госці да яшчэ аднаго «беларуска-канадскага» клуба лігі з мэтай у гэты спіс ня трапіць. І сваю задачу ізноў выканалі.
Андрэй Касціцын удзел у сустрэчы ўсё ж не прыняў: дактары і беларус працягваюць змагацца з грыпам. Нягледзячы на аптымістычны настрой настаўніка, учора разлічваўшага на вяртанне беларуса ў строй, з-за захворвання наш нападаючы прапусціў ужо другую гульню запар.
У адсутнасці лепшага снайпера каманды, якім з`яўляецца Касціцын-старэйшы (23 шайбы), двойчы адзначыўся Аляксей Кавалёў. У яго стала 22 галы, 5 з якіх — за апошнія 3 сыстрэчы. Аднак яго намаганняў хапіла толькі для завалодання аднім ачком. Якое, праўда, у сітуацыі «Манрэаля» можа стаць у выніку залатым. Бо ўчора ва Усходняй канферэнцыі стала яшчэ гарачэй: «Фларыда» адолела у гасцях «Даллас» — 6:3, а «Рэйнджэрс» таксама на выездзе саступіў «Піцбургу» — 3:4. Такім чынам, зараз дзесяты «Бафала» і ідучых сёмымі нью-йоркцаў раздзяляюць ужо толькі 5 ачкоў. Да таго ж у «шабляў» яшчэ і гульня ў запасе.
У сустрэчы з адпачываўшым ад гульняў ажно 5 дзён «Бостанам» адбылося вяртанне ў склад «клёнавых лістоў» шведа Нікласа Хагмана. Яно было цікавым тым, што да сваёй траўмы напрыканцы лютага ён часцей за ўсё выходзіў ў спалучэнні з нашым Міхаілам Грабоўскім. Пасля таго пашкоджання шведа настаўнікам Ронам Уілсанам быў зроблены ход, які значна паўплываў на выніковасць беларуса: ён стаў цэнтрам у тройцы з расіянінам Мікалаем Кулеміным і ўкраінцам Аляксеем Панікароўскім.
Таму, вядома, не здзівіла, што набраўшая ход у апошні месяц славянская тройка працягвала выходзіць разам і ў гэтай гульні. І ізноў добра паказала сябе ў атацы, працягнуўшы свае гарачыя серыі, нягледзячы на тое, што супраць таронтаўцаў грала самая добрая абарона лігі. Аляксей Панікароўскі набраў 2+1 і зараз мае 14 (4+10) ачкоў за апошнія 7 сустрэч. Грабоўскі ў тых жа сямі гульнях насабіраў на ачко менш — 13 (4+9), адзначыўшыся ўчора двума асістэнцкімі баламі як раз на ўкраінца. У першым выпадку беларус увайшоў з шайбай у зону і пакінуў яе пад кідок партнёру, у другім — знайшоў адкрытага партнёра пасам з-за варот за імгненне да гэтага атакаваўшы там суперніка і перахапіўшы шайбу (4:3).
Але калі ў атацы справы ў «Таронта» ішлі няблага, то абарона ізноў стала іх слабым месцам. Прычым пару раз няўдала дзейнічаў ззаду і беларускі форвард — двойчы яго памылкі станавіліся выніковымі. У першым голе беларус ў адзінаборстве саступіў каля сваіх варот шайбу. У шостым узяцці варот (4:6) Міхаіл не даглядзеў за аўтарам голу Чакам Кабэз’ю: знаходзячыся побач з ім і суправаджаючы таго ажно з сярэдняй зоны, так і не перашкодзіў трапна кінуць.
Да таго ж другі дзень запар не ратавалі і брамнікі, што распачыналі гульню. Учора толькі 5 з 9-ці кідкоў адвёў Керціс Джозэф і быў заманены на Джасціна Поггі на 24-й хвіліне. Сёння ўжо Поггі дзейнічаў зусім ня бліскуча: 6 галоў пасля 20-ці кідкоў і замена ўжо ў сярэдзіне гульні.
Сёння «Каларада» Руслана Салея наведаецца ў амаль родны для беларуса Анахайм. Праўда, удзел беларускага абаронцы ў сустрэчы пад пытаннем.
